جدول للعنايه برمضان ..

**

السلام عليكم و رحمة الله و بركاته  ،،
اشتقت لهالمكان كثير و الصراحه اشتقت لكم بكل مكان ماعدا سناب شات ناشبه لكم هههههه
 رمضان باقي عليه ايام قليله جدا الله يبلغنا اياه سالمين غانمين لا فاقدين و لا مفقودين يارب
ففكرت معكم و شاورتكم على موضوع الجدول برمضان للعنايه بالجسم و الشعر و البشره
طبعا بأقل وقت ممكن

اللي حابه انوه عليه قبل اوريكم الجدول هو موضوع المباغته
اللي اقصده انو انتي تكوني مروقه ما تعتني ببشرتك ابد و فجأه تتبعي اي نظام بالدنيا للعنايه
بيقلب معك عكس لانو بشرتك لسى مو متعوده انها تنغسل باليوم مرتين و كريم و حفله
بتعطي ردة فعل عكسيه ع الاأكيد
يعني انتي تخيلي انو فجأه اهلك غيرو معاملتهم لك
وش بتكون ردة فعلك اكيد الاعتراض مهما كان او ع الاقل الاستغراب نفس الشي مع بشرتك المسكينه
فلو كنتي ماتهتمي ابدددد من قبل انصحك تبدي حبه حبه

الشي الثاني انو ابغاكم تعرفو انو هذا الجدول يمديك تغيري فيه اي شي ما تحبيه
يعني مثلا انتي عندك ماسك مرا نتايجه فعاله معاك استخدميه ،
 اللي انا حاطته اكثر شي مدحوه تقريبا اغلب البشرات

و بقولكم بعد ما حبيت اكثر بالخطوات و الاشياء عشان نكون مهتمين اكثر بجانب العباده
و غير انه شهر يعني مده قصيره بعالم العنايه لو استخدمتي اي شي بتطلع نتيجته ع الاقل بشهرين
فركزت انا ع الترطيب و التقشير لأنو اضمن شي و نتايجه مرضيه لحد كبير .

نبدأ اوريكم الجدول

هذا هو " طبعا هذه صوره فقط الرابط بنهاية التدوينه "

لو لاحظتو اني تقريبا مسكت كل حته بيك
 بالاضافه انو لمن تحملي الملف راح يكون مشروح فيه كل الخلطات و الماسكات و كل خطوه تقريبا .

هالجدول للتوضيح فقط "الملف فيه اربع جداول لكل اسبوع جدول ابتدأ من ١ - ٢٧ رمضان "

ملاحظات :
١- المربع اللي فيه X هو اليوم اللي ما تسوي فيه هالشي يعني مثلا المقشر + الماسك للوجه " المفروض انك ما تسوينها يوم الأحد " لكن يوم الاثنين تسوينه .
٢- المربعات الفاضيه المفروض انك بعد كل ما تخلصي هالشي تحطي فيه صح و بنهاية الاسبوع راح تجمعي النقاط
و المفروض انه يكون عندك مجموع النقاط الموضح لو كنتي منجزه كل الجدول .
٣- روتين الوجه راح يكون صباح و مساء اذا سويتيه بس صباح او بس مساء راح تنحسب ب نص نقطه .
٤- الايام الاخيره من رمضان راح نستمر بنفس الخطوات لكن الافضل انه يكون مثلا ازالة الشعر و كذا بعد الخطوات حقتنا
و لو صادف مثلا يوم قصك لشعرك هو نفسه يوم التزييت يفضل تكنسلينه .
٥- يوم ٢٨ بيكون للحمام مغربي .
٦- يوم ٢٩ بيكون يوم تنظيف البشره و هذه تدوينه خاصه بهذا الموضوع .

طبعا هذا كله كان بهدف ترتيب الوقت و نطلع بطله كلها نضاره بالعيد
و الاهم اننا نحاول نوفر وقت اكبر للعباده ، طبعا حاولت قد ما اقدر انه ما نضيع اكثر من ساعه خلال هالروتين
طبعا بحالة تزييت الشعر او الماسك للوجه ممكن خلال هالوقت بدل ما تجلسي بس تسوي اي شغله ثانيه
لا تضيعي وقتك ابد استغلي كل ثانيه برمضان لانه فرصه ، يمكن ما تعوض ، الله يعطينا طولة العمر ع الطاعه يارب .

هذا رابط مباشر بصيغة pdf تفتح بكل الاجهزه ان شاء الله ويمديكم تتطبعونها بعد ،



اضغطي هنا 


طبعا الابديت اليومي و مشاركة الحدث لحظه بلحظه ب سناب شات
و حنبسط مرررا لمن ترسلو لي جداولكم و كيف ماشيين فرمضان ان شاء الله
حسابي بسناب شات : daloola_care
حسابي بالانستقرام : daloola_22

اتمنى من قلبي يكون عجبكم الجدول و تتطبقوه
و استودعتكم الله الذي لا تضيع ودائعه ..

عنايتي ايام الاختبارات و شوية نصايح ♥

صباح الخير ♥

كيفكم وحشني جدا هالمكان لي حول الشهرين عنه 

بس كنت الفتره اللي راحت مشغوله كثير و حتى للانستا ما كنت متفرغه 

لكن ان شاء الله احاول اقسم وقتي اكثر بعد الاختبارات 

طبعا التدوينه اللي كانت بتنزل قبل فتره و تأجلت جاهزه 100% بس ماتنفع تنزل بالشتا 

فانتظروها بالصيف ان شاء الله و اللي متابعيني انستا و سناب متأكده انهم عرفوها

تدوينة اليوم موجهه لكل طالبه الاغلب الحين يججهز لاختبارات الفاينل و الله يوفقكم و يبارك لكم بوقتكم و بجهدكم 

و كمان انا زيكم غير انه عندي مناسبه مهمه جدا فالاجازه فلو سحبت على العنايه بشرتي بتتعب لانها مدلعه 

غير مع الضغوط و التوتر و السهر فتزيد الاحتفالات ببشرتي هههههه فتجنبا لذا كله حطيت لي نظام اسهل من السهل 

و ان شاء الله استمر عليه انتو ادعو بس ههههه 

انا اختباراتي مقسمه على شهر كامل و تقريبا كل اسبوع ماده او اثنين فرتبت عنايتي على هذا الاساس 

اعرف ناس مدلعين جدولهم موزع على اسبوع فعشان كذا شوفو اش يناسبكم و حطوه 

يلا نبدأ 

اول شي بكون منقصه لو ما اتكلمت عنه 

هو العنايه الداخليه , و هو تقريبا اكثر شي يتعب البشره و الجسم كله  بعد السهر 

فعشان كذا لازم تشربين مويا بكثره في دي الفتره لان دماغك مكون من مويا كثير و اذا نقصتي بشربها 

راح يتعب راح تضيع المعلومات منه , كثير بنات يشتكون من موضوع انو ذاكرت و تعبت بس اول ما ادخل الاختبار 

انسى او اول ما ارجع اراجع انسى ! هذا سببه قل المويا كيف تبين دماغك يسترجع المعلومه و هو مافيه موصل و موقد لهالشي !

كمان الاكل انتي صح يمكن طول فتره الاختبارات ما تبذلي مجهود جسدي لكن تبذلي مجهود عقلي 

فعشان كذا بتحتاجي لفيتامينات و طاقه اكثر و بليز بليز لا تاكلون شوكليت كثير 

الا بحالة اذا كنتو من الناس اللي يجرون و هم يذاكرون 

ههههههه شخصيا اعرف وحده كذا , حالتها صعبه ! 

يعني كل يوم سوي لك كاسة سموذي اوعصير تحبينه , انا ماما تهلكني بالبرتقال فذيك الفتره
و اذا عجزت مرا تسوي كيكة برتقال 

الله يحفظها مدري ليه برتقال بالذات بس من جد في فترة الاختبارات احس ان فيني شي صحي من كثرة البرتقال 

اشربو كمان مشروبات تهدي الاعصاب نعناع , بابونج , شاي اخضر 

و عادي كولو شوكليت بس خليها مكافأه لك ممكن بعد ما تخلصي كل شابتر تاخذي قطعه عشان تتحمسي انتي بطله 

نروح لخارجيا 

بالنسبه لي اكثر شي احسه يفيد بشرتي الماسكات 

بس من جد مالي خلق كل يوم اخلط رغم انه اغلب الماسكات جمعي المكونات و اخلطيهم و بس ! 

لكن برضه نستثقلها فعشان كذا اخترت ماسك مدة صلاحيته اسبوع و يعتبر بيرفكت بالنسبه للثانين اللي ما يتحملون اليوم

مكوناته :

نص بطاطسه صغيرره مسلوقه - 3 ملاعق حليب سايل - تقريبا ثلاث ملاعق حليب بودره - عسل - ثلاث ملاعق قشطه 

نخلط كل المكونات بخلاط الكاس الين يصير قوامه كريمي تقريبا زي الماش بوتيتو 

ممكن لو خلاطك كبير تهرسي البطاطس بالشوكه و تضيفي المكونات الباقيه و تخلطيها

*ان شاء الله حنزله بالانستقرام مره ثانيه لانه موجود اوردي بالهاشتاق من قبل 

نحطه بعلبه و ينحفظ بالثلاجه لمدة اسبوع ممكن يخرب قبل و ممكن بعد حسب الجو عندكم
اهم شي خذو منه بملقعه نظيفه 

و نحط منه مرتين ل ثلاث بالاسبوع , اي شي فيه بطاطس اعرفو انه يفتح و يصفي و يعطي نظاره 

طبعا في ناس بيقولو ليه ما تشتري جاهز و تريحي نفسك بقول اولا انا احب الطبيعي و ثانيا الجاهز مهما وصل 

مو زي الطبيعي اللي انتي عارفه اش فيه و عارفه انه خالي 100% من الكيماويات 

الشي الثاني هو التونر انا عني بحط موية ورد ببخاخ بالثلاجه و كل صباح احط منها "الوقت اللي اضمن افتح الثلاجه فيه"

عندكم خيار ثاني و هو تقريبا مدة صلاحيته لاسبوع و للناس اللي مالها خلق ماسكات 

هو تونر الشوفان : شوفان , موية ورد , نقطةة زيت لوز لو عندكم فيتامين اي افضل حطو كبسوله او ثلاث نقاط منه 

اتركوه يوم كامل تقريبا و بعدها صفوه و حطوه ببخاخ و بالثلاجه كل يوم مرتين بخو منه صبح و ليل 

بطل يفتح و يصفي و يزهي البشره بشكل ملحوظ 

طبعا هذا كله مع كامل روتينك المعتاد غسول و مرطب و سنفره مره او مرتين بالاسبوع 

نروح للجسم 

ما يحتاج حوسه بس انا سويت هالصابونيه و حبيت نتايجها للان ممكن تسوونها 

و استخدمها يوميا بدل الشاور جل , بطله الاغلب يمدحونها جدا 

مكوناتها صابونة بابايا 4 في 1 و اسكينول بالبابايا و قارورة موية ورد 

تقطع الصابونه لقطع و نحطها ب برطمان و نحط عليها كامل الاسكينول و المويا و نتركها لمن تذووب الصابونه 

عني سويتها لتجربه نص الصابونه و نص الاسكينول و نص موية الورد و اخذت تقريبا ثلاث او اربع ايام لين ذابت 

بس اتوقع لان انا حطيتها بغرفتي يمكن لو بالمطبخ ذابت اسرع 

طبعا بعدها لازم نرطب 

و لازم سنفره مرتين او ثلاث اسبوعيا 

شعري بايام الاختبارات يجف جدا جدا فاحاول بس اني ادهنه بزيت لو قبل الشاور بنص ساعه 

و ابعد عن الاستشوار نهائيا لانه بينشفه بزياده , ممكن بالايام اللي ما يكون عندنا فيها اختبارات 

احط زيت من الليل و انام فيه صح ما احب بس مضطره غير كذا ما اكثر حيل احط بالاطراف بس

 و الروتين العادي شامبو و بلسم و ماسك كالمعتاد ما اغيره

 

رموشي , حواجبي , هالاتي , اظافري احط عليهم فازلين قبل انام زي دايم 

و جد جد ماشاء الله فرق معي لان حواجبي ارسمها يوميا فلازم اعوضها 

مهما كان المنتج غالي او ما يضر بالنهايه هو منتج كيميائي فلازم نهتم بهالنقطه

بالنسبه للمذاكره ما احس اني لو قلت طريقتي بتفيدكم لان كل انسان و له طريقته .

بس اهم شي حطي نوت عند كل صفحه بورقه و لمن تجي تراجعي طلعيها كلها و راجعي منها
 بتصير اسهل و مرتبه اكثر

و نصيحه لو كنتي بالجامعه و تذاكرين من سلايد اطبعيها لانو اشعة الشاشه تضعف التركيز و بالتالي 

ما تساعد انها تثبت المعلومه براسك غير انه بتتكاسلين انك تراجعين منها كلها .

كمان فكرة الربط جميله جدا و تثبت المعلومه براسك بقوه 

انك تربطي المعلومه بشخص او موقف او مكان بحياتك 

زي مثلا افتكر ايام الابتدائي ماشاء الله شايفين كيف ! انو كان عندنا نحفظ رواة الاحاديث 

فكان في راوي اسمه ابو ذر و كان هو من اول من حيو الرسول عليه الصلاة و السلام بتحية الاسلام

فصديقتي البطله ربطت انو "الضر " اللي هم النمل يتكلمون و يسلمون على بعض زينا فعشان كذا للان ما نسيت هذه المعلومه

ممكن لو عندك خطوات تاخذي اول حرف من كل خطوه و تعطيه اسم شخص بحياتك 

مثلا حرف الميم تعطينه اسم محمد و هكذا , و لو كان عندك مميزات و عيوب تعطين اول حرف من كل ميزه لشخص تحبينه 

و اول حرف من كل عيب لشخص تكرهينه ههههههه 

كمان تسوين كلمه بأول حرف منهم برضو بطله خصوصا لو كانت الكلمه تضحك هنا اضمني انها ثبتت خلاص

و الاحلى بالنسبه لي انك تلحنين الكلام و تغنيها هنا صح تضحك تصير لكن صدقيني محا تنسينها هههههههه 

بس تقريبا هذا كل شي ببالي , اهم شي بنات تريحون نفسكم و تعطون نفسكم فرصه انكم تعيشون حياتكم 

اقصد انه مو 24 ساعه تروح بين نوم و اكل و مذاكره كذا انتي تظلمي نفسك 

لازم تعطين نفسك ساعه صفا لك باليوم تسوين فيها شي تحبينه و احلى شي لو كانت هالساعه مكافأه 

في نفس الوقت لا تتهاونين مع نفسك فالوقت 

اعرفي ان هالوقت محا يرجع مره تانيه بمجرد ما يروح اليوم ما عندك مجال تعوضينه 

و كمان لا تراكمين و لا تشوفين انه اوه اختباري بعد اسبوع بعطي نفسي اجازه الين قبل الاختبار بيوم 

حتى لو كان سهل ما تضمنين نفسك ابد 

ممكن تتعبين تمرضين لا قدر الله ممكن يصير شي بالبيت لا قدر الله 

فحطي كل الاحتمالات الممكنه و انجزي بدري بدري و لا تراكمي ارجوك ! لمصلحتك ♥
و كمان اذا صار لك مشكله لا تضغطين على نفسك روقي و اهدي و خذي كفايتك بالنوم
و ابدأي ذاكري و يإذن الله ربنا محا يضيع لك تعب 

و تذكروا " اذا كنت مجبرا فاستمتع , و قوله تعالى " و قل اعملوا فسيرى الله عملكم و رسوله و المؤمنين "

سوو اللي عليكم و الباقي على رب العالمين ♥

اتمنى من قلبي اني قاعده افيدكم و اقدم لكم شي 

بس لا تنسوني من دعوه بظهر الغيب

ربنا يوفقنا و يبارك لنا بجهدنا و وقتنا و يعطينا على قد تعبنا و اكثر 

استودعتكم الله و اشوفكم بتدوينه جديده ان شاء الله ♥♥♥

تنظيف عميق للبشره في المنزل

صباح الخير ، صباح البدايات النقيه 
اليوم اول يوم في سنه جديده صفحه جديده تستنى بصمتنا عليها 
كل سنه كل يوم و كل دقيقه هي فرصه لنا نكون احسن من اللي قبله 
حبيت ابدأ معكم بروتين تنظيف و كأني انوي ننظف مع بعض صفحاتنا و نخليها انقى و اطهر ، يا رب ❤️ 

موضوعي لليوم انطلب مني كثير و كثير 
و هو تنظيف البشره العميق ، طبعا فالبيت 
لازم نحط ببالنا انو هالشي يبيله ممارسه عشان نوصل لنتيجه احترافيه 
لانو هي مو طريقه وحده مافي غيرها لا هي تكنيكات مختلفه و كل وحده و يدها تعطيك نتيجه 
فعشان كذا كل مره تكتشفي طريقه افضل من اللي قبلها ، و مع الوقت تزيد خبرتك و تعرفي اش الافضل لبشرتك 

طبعا هالتنظيف يكون كل شهر مو كل اسبوع 

يلا نبدأ ؟

اول خطوه هي نجهز لنا مكان مناسب نحط فيه اغراضنا
عني افضل المطبخ عن الحمام اكرمكم الله لان فيه كل شي ممكن فجأه احتاجه
و ممكن بغرفتك عادي " محا احط لسته بالادوات بتركها لكم انتو تحددوا من الخطوات اش تحتاجون"

ثاني خطوه جهزي بشرتك نظفيها كالمعتاد بغسول و جففيها
يفضل انك تختاري وقت تكون بشرتك فيها هاديه مافيها حبوب و لا التهابات عشان تشتغلي على راحتك

ثالث خطوه و هي فتح المسام
هالخطوه مهمه جدا لو ضبطت كل اللي بعدها بيضبط ان شاء الله
لانها تخلي البشره تمتص كل المكونات اللي تنحط عليها بشكل افضل
في عدة طرق و اجهزه مختلفه كلها بالنهايه تعطينا نتيجه وحده

اول طريقه و هي الطريقه التقليديه : منشفه كبيره و مصدر بخار
اغلي مويه و حطيها بزبديه زجاج كبيره لا تخلينها بقدر لانه المويا تتفاعل مع المعدن
ممكن تضيفي للمويا زيت لافندر او نعناع لمزيد من الاسترخاء
اجلسي عندها تقريبا 5-8 دقايق و بعدها قومي
بس اهم شي لا يكون المكان اللي انتي فيه بارد لانو المسام بتتسكر و كأنك ي بو زيد ما غزيت هههههه

زي كذا تمام بس لمو شعركم لا تخلونه مفتوح

الطرق الاخرى تكون بالاجهزه
فيه اشكال كثيره زي هذا مثلا  و هو تقريبا افضل الاشكال و أأمنها للاستخدام

عندكم هذا اللي تقريبا نفس حق الصوالين
هذا يفضل استخدامه للاحترافيين لانه انتي تتحكمي بمدة توجيه البخار يعني لاي منطقه تعطيها وقت اكثر من غيرها
و هذا شي صعب تحددينه من البدايه

رابع خطوه هي تنظيف المسام
هالخطوه هي الهدف الاساسي من عملنا عندنا هنا كم كذا طريقه
اولها و الشائعه جدا هي باستخدام العود دا "يس نسيت اسمو ههههه "

هالاداه سلاح ذو حدين هي ممتازه و افضل شي فيها انها ما توسع المسام
لكن صعب استخدامها لانو لو استخدمتيها بطريقه خطأ ممكن تجرحي نفسك او توسعي مسامك بطريقه غير ملحوظه
اهم شي قبل تستخدمينها عقميها ابسط شي جيبي مسحه طبيه و امسحي راسها
"عشان التدوينه فيها صور كثير بحط روابط بتويتر لطريقه الاستخدام و بحاول ادور انظف مقطع لووول"

طريقه ثانيه هي بأستخدام اللصقات الجاهزه
هالطريقه كثير كثير اشتكو انها توسع المسام بدل ما تصغرها
بس حل سريع و مستعجل و للناس المبتدئه
كمثال بيوريه و في من نيفيا و كثير شركات

طرق اخرى ماسك الجيلاتين
اتوقع تعرفو قد ايه احب دا الماسك و هي طريقتي فأزالة الرؤوس السوداء
لانه اوقات اقول وجهي نظيف ما يحتاج اروح اسويه تتطلع بلاوي تحسي طلع لك جلد جديد نظيف ههههه
فانصحكم فيه اكثر من اللصقات لانه يشد البشره بسبب وجود الكولاجين

هالصوره من انستقرامي مع طريقته :

""نحتاج : -جيلاتين بودره " تلقونه بالدانوب بنده ما لقيت فيها ، و ممكن بالتميممي ، اما بهذا الشكل او بشكل اظرف جهة البيكن باودر و دي الاشياء" .
- حليب او شاهي اخضر "مو مهم يكون حار".
- منشفه دافيه . - مويا دافيه في زبديه عميقه او مايكرويف . 
الطريقه :. نحط فزبديه ملعقه و نص جيلاتين و ملعقه حليب او شاهي اخضر ، نقلبهم مع بعض شوي و نحطهم فوق الزبديه اللي فيها مويا حاره "حمام مائي" ، و نقلب اليين يصيرو سايل ناعم مافيه كتل و كلاكيع . 
نجيب المنشفه الدافيه و نحطها ع الوجه عشان تفتح المسام ، و نحط بعدها الماسك بس ابعدوا عن اماكن الشعر ، اتركوه تقريبا نص ساعه و بعدها شيلوه و شوفو البلاوي اللي تتطلع طبعا هو ماسك مطاطي يعني يتقشر ما يتغسل . .
.
.
طبعا هو فايدته نفس فايدة لصقات الرؤوس السوداء ينظف تنظيف عممميق للبشره ، و يطلع الاوساخ من جذورها ، يعني حطو ببالكم هو ما يعالج يعني ما يصغر المسام او يقلل من الرؤوس السودا ابدا 👌😌❤️❤️❤️

""

اخر حل هو ماسك بياض البيض نتيجته قريبه من ماسك الجيلاتين فاللي ما تلقى الجيلاتين بالسوق تسوي هذا
كمان نزل بانستقرامي كذا مره
مكوناته : عباره عن بياض بيضه + دقيق رز
نخفق البيضه الى ما تكون رغوه و بعد كذا نضيف ملعقه من دقيق الرز عليها
طريقة الاستخدام : نجيب مناديل و نقطعها على شكل الوجه و بعد كذا نفرد الماسك على كل الوجه و نجيب المناديل
و نحطها عليه مباشرة قبل يجف و نتركه تقريبا نص ساعه لين تحسي وجهك صار يابس هههه
تبدأي تنزعي الماسك بشويش " لا تقربونه من شعركم و حواجبكم لانه بشيلهم بطريقه هههههه"
"اللي ما فهمت شرحي غردت بفيديو بتويتر يشرحه " يسير شكل وجهك كذا بس هي حاطه طبقات كثيره مناديل

اعترفو مين انفجعت هههههه

خامس خطوه بعد ما نظفنا الرؤوس السوداء نحتاج نقشرها و نزيل الجلد الميت
نحتاج سنفره جاهزه مثل سانت ايفز او لوريال او اي سنفره انتم مرتاحين عليها

نفرد السنفره ع الوجه و نعرض الوجه على البخار لمده خمس دقايق تقريبا " لحد ما تبدأ تنشف السنفره "
نرفع الوجه عن البخار و نبدأ بحركات دائريه مع ضغط خفيف نسنفر الوجه
بعد كذا ننظف الوجه بأستخدام هالاسفنجه و بعدها نشطفه بمويا

الخطوه السادسه و هي ترطيب البشره بماسك مناسب
هالخطوه فيها خيارات كثيره جدا جدا اي ماسك تحبيها اختاريه سواء جاهز او طبيعي
فانستقرامي في مجموعه كبيره ماشاء الله اختارو منها اللي يناسبكم فهالهاشتاق #daloola_c_h

انا ممكن اختار ماسك بالخيار او البطاطس لان فيهم نسبة مويا كبيره و البشره تكون عطشانه هالوقت
ماننسى العيون نحط عليها شرايح خيار او بطاطس و نسترخي

نتركه عالوجه المده المحدده و بعدها نغسله و ننتقل للي بعديه

الخطوه السابعه
نقفل المسام ممكن بثلجه نحطها بقطعه شاش و نمررها ببطء على كل الوجه
ممكن نرش موية ورد بارده على كل الوجه و ممكن تونرك المعتاد يقوم بالمهمه

الخطوه الاخيره هي الحفله و خليتها اخر شي لعدة اسباب
لان البشره بتكون نظيفه و لانو بعد هالخطوه البشره يبغالها عنايه خاصه و ما تكون قابله للشد و السحب هههههه
هالخطوه هي ازالة شعر الوجه عرفتو ليه اخر شي ؟
طبعا هالخطوه فيه عدة طرق مختلفه لانجازها
بقول هنا و دايم اقول انه اتبعي الطريقه الشايعه في عيلتك يعني امك و اخواتك يستخدمونها
عشان يكونو عارفين اش افضل طريقه لعملها و اش يتصرفوا لو طلع حبوب او اي شي ثاني
لانو دايم تجيني اسئله اش افضل طريقه لازالة شعر الوجه هو مافي افضل لانه كل طريقه و لها عيوبها
لكن زي ما قلت الافضل تستخدمي اللي كل اللي حولك يستخدموها بدل ما تستخدمي طريقه غير
و يصير معاكي شي لا قدر الله و تقولي لهم ساعدوني يقول ماا نعرف !

احنا ببيتنا يستخدمو الفتله بهالجهاز فأنا استخدمها معهم و مرتاحه عليها

لكن فالاوقات اللي مافي احد يسوي لي استخدم شرايح فيت

ما تفرق الطريقه قد ما تفرق العنايه بعدها
لازم تكون بشرتك نظيفه و بعد ما تشيلي لو كنتي تشيلي بشمع فلازم تستخدمي زيت اطفال مثلا عشان تشيلي البقايا
و بعدها بكل الطرق لازم تمرري ثلجه ع المكان عشان تهدى و تتقفل مسامك
و بعدين تحطي طبقه من مرهم فيسودين عشان لو طلعت حبوب تختفي
و ممكن تكرري هالعمليه مرتين باليوم اللي شلتي فيه .

**على فكره الوان الخطوط تفرق هو لاي نوع من البشرات "اسألو الصيدلي عنها "

الخطوه الاخيره ترطيب البشره ما عدا الاماكن اللي حطينا عليها المرهم بمرطبك كالمعتاد

و نشرب مويا بعدها لانو البخار يفقدنا مويا مره كثير من جسمنا و نعيما ي جميلاتي ❤️

و الحمدلله اوه و اخيرا خلصت حبيت اختصر لكم كثيرر و ذكرت اهم الخطوات اللي تفرق نتايجها معنا
اتمنى اني اكون افدتكم بهالبوست و ان شاء الله اشوفكم ببوست اخر❤️

سبحانك اللهم و بحمدك اشهد ان لا اله الا انت استغفرك و اتوب اليك ..


1-1-1436 > سنه سعيده بإذن الله❤️❤️

قبل او بعد ، بعد او قبل ، خطوه بسيطه تغير حياتك للافضل !!

السلام عليكم
زمان ي فن   , يمكن لي شهر عن هنا
بس منجد الجامعه ماخذه وقتي كله ، و دايم اول اسبوعين كذا بعدين نتعود و نرتب وقتنا
ف ان شاء الله لا تنظم وقتي بعد الحج بحدد يوم معين للتدوين و بتكون تدوينه دسمه كل اسبوعين ان شاء الله

سألتكم الاسبوع اللي فات وقت ما كنت اجهز التدوينه عن الخطوات اللي مختلطه عليكم
زي مثلا ايهم اول الكريم المرطب او واقي الشمس و غيرو
و طبعا انتو ضفتووا اسئله زياده و اليوم ان شاء الله ح نعرف بأيش نبدأ و بأيش نتهي و ليش ؟؟
يلا نبدأ 

1- افرش اسناني اول او اغسل وجهي بغسولي المعتاد؟؟
هنا حقول اول شي فرشي اسنانك بعدين اغسلي وجهك
و اغلب البنات يسوو العكس و هذا هو اللي يسبب الاسمرار و الجفاف حولين الفم
لانه المعجون يبقى على الجلد بس انتي ما تشوفينه
بس لمن نغسل بالغسول بعد تفريش الاسنان فالغسوول يزيل اثر المعجون فهالمنطقه
طبعا محا تفرق معك من اول مره بس مره على مره توضح النتيجه ..

2- احط برايمر العين اول او الكونسيلر ؟؟
اول البرايمر لانه يعبي المنطقه و ما يخلي الكونسيلر يخطط
هذا غيير انه يعطي ثبات اطول للكونسيلر و يسهل مده
هنا اقصد انو المفروض نحط برايمر للعين تحت العين "المنطقه اللي نحط فيها الكونسيلر"


3- احط الميك اب اول او استشور شعري ؟؟
استشوري شعرك اول لأنو لو العكس
الحراره تغلغل المنتجات اللي على وجهك لداخل البشره
و غير انها تخلي الميك اب يتأكسد و هذا يأثر سلبا ع البشره
بالاضافه للناس اللي يلبسو عدسات من جد لا تخاطروا و تلبسو عدسات قبل الاستشوار
لان لا قدر الله ممكن تسيح العدسات فعيونك الله يحمينا يارب
و فنفس الوقت لا تلبسوها بعد ما تخلصو مكياجج لانه ممكن تدمعي و يسيح الكحل و يروح المكياج شوربه ههههه  ..

4- السيروم قبل الاستشوار او بعده ؟؟
هنا يحدد نوع السيروم في بعضها فيها حمايه من الحراره تنحط قبل
لكن اكثر شهره هو سيروم كريستال و هذا ينحط بعد الاستشوار
عشان يعطينا مظهر لامع و صحي بس ما نكثر..

5- الاضاءه السايله بعد الفاونديشين او قبل ؟؟
هنا حقولك الافضل لانو لو حطيتها بعد حتمشي لو قبل حتمشي
لكن الافضل تخلطيها مع الفاونديشين لانو يعلي من ثباتها و يخليها تبان طبيعيه اكثر..

6- الديودرنت قبل او بعد ما البس ؟؟
قبل عشان يمدي يجف و يبدأ مفعوله و ما يمسك فالملابس خصوصا لو كان سايل او ستيك..

7- الزيت افضل قبل الشاور او بعده ؟؟
المتعارف عليه اننا نحطه قبل الشاور و هذا اللي يخليني اقول ان الزيت نتايجه بطيئه بس تستاهل
لكن الصحيح و اللي نتايجه تبان اسرع هو بعد الشاور " على شعر نظظظيف "
ليه ؟ لأن فروتنا على اختلافها سواء دهنيه او جافه تفرز زيوت طبيعيه
فلمن نحط قبل الشاور تكون الفروه افرزت بما فيه الكفايه فتتراكم الزيوت فيسير امتصاص الزيت ابطئ من لمن نحطه بعد
زي لمن نجيب اسفنجه مبلوله و اسفنجه جافه ايهم تمتص المويه اسرع ؟؟ الجافه اكيد
و ففس الوقت بعد الشاور تكون المسامات مفتوحه و متقبله للمنتجات اكثر..


8- عاده صصحيه و هي اصلا مذكوره بالقران و السنه ؟؟
الا و هي اننا نحلي و ناكل فاكهه قبل الاكل الرئيسي
ليه ؟ لها تفسير علمي طويل لكن الزبده عشان ينشط المعده و يهيأها تستقبل الاكل
تخيلو انك تكوني نايمه و فجأه صحوك قالولك ضيوف مهمين عند الباب نفس الشي مع المعده ههههه لا اشبه مره ثانيه 
و دليل على كذا اننا لمن نصوم اننا نفتح ريقنا بتمر لمن نصوم و بيوم العيد قبل الصلاه
سبحان الله !!

9- الكريم المرطب اول او واقي الشمس ؟؟
الكريم المرطب عشان تتشربه البشره و تهيأها تستقبل الواقي اللي يعمل ك طبقه ع البشره
ما يخلي شي بعده البشره تتشربه..

**شكلي صورت الصوره و انا مغمضه ههه**
10- مقشر او غسول اول ؟؟ 
الغسول ليه ؟؟ لانه هو روتينك تبدأي بالغسول فلا تغيري ضيفي له بالنهايه
غير كذا المقشر وظيفته يقشر الجلد الميت و يزيله
اما الغسول فهو عليه تنظيف البشره من زيوت مكياج و غبره و يلين الجلد للمقشر
فعشان كذا لمن نقشر اول ثم نغسل بالغسول ما نستفيد شي لان المقشر قام بعمل الغسول
و منعته الاوساخ اللي ع البشره يوصل للجلد الميت و يجي بعده الغسول ما يقشر و لا شي !!

11- ازالة الشعر اول او الحمام المغربي"التقشير" ؟؟
بقولكم الافضل الحمام المغربي عشان يشيل الجلد الميت و يطلع الشعر تحت الجلد
و بعد كذا تسهل علينا شيل الشعر بأي وسيله  بس اهم اهم شي انك ما تسوينها بنفس اليوم لا اتركي فاصل ع الاقل يومين
تخيلو صديقتي عروس شالت شعر جسمها و سوت حمام مغربي بنفس اليوم
بشرتها التهبت و صرت مححمممره و تحكها و ثاني يوم عمتها و تنقشت
تخيلو بعد ما بدت تختفي الحنه طلعت لها نفس النقشه من جلدها يعني جلدها صار منقش من نفسه
و طبعا حطو البلا فالنقاشه لكن بعدها اكتشوفو انو مساماتها كانت مفتوحه و بشرتها متحسسه
و الحنه لان فيها دوا قويه تغلغت بجلدها " ي بعدي الله يسعدها وين ما كانت "


الى هنا و خلصت التدوينه اتمنى تكون وضحت لكم لو القليل من اللبس اللي كان حاصل
اذا حبيتو التدوينه شاركوني برأيكم هنا او في انستقرام او تويتر و لا تنسو تسوو اشتراك بالمدونه عشان يصلكم كل جديد
و الى اللقاء بتدوينه جديده , استودعتكم الله 

افكار سهله لفطور لذيذ + وصفات فطوري الانستقراميه ♥♥

صباح الخير

كيف حالكم ؟؟ كيف حال النفسيه مستعدين لبعد بكرا ..
 اش اكثر وجبه تفضلونها ؟؟
عني بقولكم الفططور و خصوصا بالاجازات
لانو ابدع فيه غير كذا انا انسانه صباحيه , عادي جدا اصير طول اليوم نفسيه لاني صحيت العصر
احس خلاص اليوم ضاع , زمان كنت اعتبر وجبة الفطور سناك
اما الحين مع ثورة الصحه اللي بنعيشها بدأت تكبر و تصير وجبه متكامله
طبعا صرت احرص انو ع الاقل تكون صحيه بنسبة 80% لانو بوجهة نظري هي اكثر وجبه سهل نخليها صحيه
و كلنا عارفين قد ايش هالوجبه مهمه ، بس كثير ناس يقولو مافي وقت بقولكم الحريص ع الشي بيلقاله وقت و بنفس الوقت
بساعدكم بأفكار بسيطه و يمديكم تسوونها بسرعه
و احرص كمان اني اول ما اصصحى اشرب كاس مويه بارده ع الريق ينقي الجسم من السموم و يهيئ المعده للاكل
و غالبا ما افطر الا بعد ساعتينن او اكثر من اول ما اصحى


فاليوم بأذن الله حنتكلم عن وجبة الفطور ايام الدراسه بشكل موجز
حنقسم الفطور لقسمين
 فطور عادي : هو اللي يكون سريع و سهل و تاكلينه بالبيت
 فطور الشنطه : هو اللي تاخذيه معك للدوام


قبل ما ابدا في اشياء لازم تكون فدولابك للفطور و غالبا تكون متوفره فأغلب البيوت بس بصوره غير صحيه
اول شي الكورن فليكس 
لو ترجمنا المسمى بيكون رقائق الذره يعني المكون الاساسي فيه الذره
لكن لو شفنا شي اسمه بران فليكس اللي هو رقائق النخاله بيكون بديل صحي
زي هذا

بكون صريحه معكم فالبدايه راح تستثقلو الطعم لكن انا كنت اخلط معه كمشه من سبيشال كي
و حتى سبيشال كي و فيتنس صحي الى حد ما
و الاهم من هذا انه هالانواع تشبع اكثر من الكورن فليكس

الشي الثاني الشوفان ي الله ويني عنه من زمان له وصفات كثيره و لذيذه
كنت اكره جدا حتى بالشوربه و الحين لا خلص اسوي مناحه هههههه

الشي الثلاث ما عرفت اش اسميها اللي هي الحشوات اللي ندهن بها الساندوتشات
زي زبدة الفول السوداني بس ما نكثر منها لانها مليانه سعرات مقارنه بغيرها
انواع اخرى من الزبد كاجو لوز بندق < طبعا مو نوتيلا 
مربيات انواع كثيره صحيه ، لبنه و ابعدوا عن الجبنه اللي كلها زيوت و بلاوي

الشي الاخير الفواكه
حلو كل اسبوع تسوو زياره لسوبرماركت و تنوعوا من الفواكه 
احس الحين سار سهل نشتري فواكه و ما تخرب لان نظام السوبرماركتس زي بنده و الدانوب 
حتى لو حطيتي حبه وحده تتوزن و تتحاسب فشي كويس 

في اشياء فكل تقضيه تكون بالعربيه زي التوست البر و البيض و الخضار 
فمالو داعي نفصل فيها ..





نجي لفطور البيت :

اول شي حنبدأ بالاشياء اللي ممكن تجهزيها من الليل و تتركيها بالثلاجه

زي كذا اش تحتاجي ؟ زبادي او روب - عسل - فواكه على ذوقك " موز - توت - تفاح - الخ " - مكسرات " هالوصفه مستخدمين جارنولا"
بعد كذا في زبديه او كاسه يفضل تتغطى تحطي طبقه روب و بعدها الفواكه و العسل و نكرر
فالنهاية نغطيه و نتركه بالثلاجه و الصباح نرش عليه المكسرات و نتلذذ بالطعم
فعلا لذيذه و خصوصا الحين بالصيف تنعش امم اشتهيت ههه ...

فكره اخرى : نحتاج شوفان - زبادي - فواكه - حليب -
ف الوصفه استخدموا حبوب الشيا تلاقوها متوفره بالدانوب بس اذا ما اتوفرت مو مشكله
نحط كل المكونات مع بعض و نخلي شوي من الفاكهه و نخلطهم مع بعض و فالثلاجه الصباح نضيف عليهم الفواكه
هذه يسمونه اوتميل مو الكل يحبه فجربوه قبل
"اللي بالموز ضايفين له بودرة كاكاو"

ممكن اجهز هالصحن من الليل ؟؟ اكيد
اسلقي البيض من الليل و حطيه بالثلاجه كامل لا تقشريه ,
 لا تستغربوا من يوم اعرف نفسي و ماما تسلق البيض الليل و ناكله الصباح و ماشاء الله ما فينا الا العافيه
الفواكه قطعيها من الليل اكيد و يبقى التوست
الصباح اول ما تقومي قطعي البيض و طلعي الفاكه و حطي التوست بالحماصه تجهزي
بتلاقين كل شي جهز و احلى فطور بثواني

اكيد محا انسى اشهر و اسرع وجبة فطور بالعالم
و هو الكورن فليكس  او البران فليكس اكثر نوع اشتريه هو سبيشل كي
احبه مع اللبن الزبادي و التمر و احليه بالعسل وجبه متكامله لحد كبير و لا الذ
فيكم تسوونه بالحليب او بالعصير زي ما تحبو و تضيفو لها فاكهه زي موز فراوله توت ترفعو من قيمتها الغذائيه

السندويتشات افكار كثيره منها

اللي تحت البيض افوكادو مهروس


ناخذ جوله ع الصور اللي قد نزلتها بالانستقرام من فطوري في الويكند ماشاء الله

 هنا نرفع لافتة الحاجه ام الاختراع
لحظه اختبركم اش تتوقعون فالصوره ؟؟

خلاص حقولكم هذا عيش برجر دخلت المطبخ مافي شي يحمس تاكليه
لقيت عيش برجر قديم يمكن له يومين , خفقت بيضه مع حليب و فانيلا و غطستهم فيه
و ع الشوايه و طلع لذيييذ مع التوت و العسل , فلا تقيدوا نفسكم فكروا خارج الصندوق

 هنا قمت تعبانه و مالي خلق شي جهزت لي ربع قرص صامولي مدهون بزبده فول سوداني و عليه موز
و عسل و كوب قهوه تركيه عشان اصحصح , اصلا لو تشوفو شكلي وقتها كيف الحمدلله ع الصحه

 قلوب قلوب قلوب هذا بان كيك بتعرفون وصفته تحت بس لذيذ لذه , اقدر اقول انه هو اللي حببني فالشوفان
و غير كذا لمن اعرف اني طالعه مشوار طويل اكله لانه يمسك البطن ما يجوع بسرعه

 اومليت مافيه شي زايد بس الحلو فيه انه يحتوي على نسبة خضار و تنوع يشهي العين تاكل
فإذا كان عندك مريض او طفل حطي له الخضار اللي يحبها و زينه له و ان شاء الله حياكله

 فطوري بأيام الكسل كورن فليكس سبيشل كي و تمر و زبادي عشان ارفع قيمته الغذائيه
اتوقع هنا حليته بمربى يس يس عليا طلعات غريبه

 وجبتي المفضله اللذيذه بس الغريب ما احب اكلها لحالي هههه نفسيه
اسويها لمن نكون مجتمعين ع الفطور و يكونو جايبين فول و تميس و كذا
انا ما اكل الفول و لا خواتي فنسوي بالتميس هذه عباره عن تميسه " بسكوت" و فوقها جبن كيري و زيت زيتون و زعتر ناشف
و ندهن التميسه و فوقها الخضار اللي تحبيها , تقرمش و لذيذه جدا خصوصا لو كان الزيت طاززه و اصلي
"شميت ريحته و انا اوصف " يبووي

بيتنا نحب الصامولي اكثر من التوست فهذا فرنش صامولي هههه مافيه جديد
مجرد سكر و حليب و بيضه و فانيلا و عليه عسل  ,,



نروح لفطور الشنطه :
كثير بنات ما يمديهم يفطوروا بالبيت و ما ودهم يفطوروا من الجامعه اللي اغلب اكلهم غير صحي بتاتا
فياخذوا معاهم فطور , ع الاغلب انا اخذ معي سناك و اكله بالبريك
طيب اش ممكن اخذ معي

ابسط شي و اسرع شي السموذي و خصوصا للبنات اللي يستحو عادي حطيه بمق و اشربيه كانه كوفي
و كمان منعش للصيف ..
ماله مقادير محدده او وصفات محدده , الافضل و المشبع اكثر مجموعة فواكه معاهم لبن زبادي
ممكن ثلاث انواع او اربع مع لبن زبادي و مويه للخلط , حلو لو تقطعي الفواكه و تثلجيها من الليل


كمان سلطة الفواكه مع قطعة توست و شريحة جبنه مثلا

كمان ممكن تاخذوا سناك زي مكسرات و فواكه

كثير بنات وقت البريك يفتحو شنطهم و يطلعو علبهم
و هذا شي جيد جدا

حدلكم على كم حساب فالانستقرام هم لهم الفضل بعد الله في حبي للفطور
**اضغطوا على اسم الحساب تنفتح في الانستقرام **


bayan2sj بيان ملكة السموذي و الاكل الصحي و عندها مدونه مفيده جدا
softmud90 هي اللي عندها وصفة البان كيك اللذيذ و غيرو كثيررر وصفات شهيه
miss_elegantsweet عندها وصفات كثيره ماشاء الله مو بس فطور
videomeals هذا نفس وجبات 15 ثانيه بس النسخه الاجنبيه الصحيه , كانو عاقلين بس الحين صار شغلهم اغلبه دعايات
فأرجعو للوصفات القديمه
nnuerblog هذه ماشاء الله مبدعه فالاكلات ككل اتوقع عندها حساب خاص بالوصفات
mmkuwari هذا ولد قطري و انا اكتب عن فطور الشنطه طرا على بالي دايما يسوي فطوره و يورينا الشنطه اللي ياخذه معاه للدوام
في حسابات كثيره جميله و مفيده جدا بس هذه التوب عندي و كل مابغى شي جديد اروح لهم
و مقاديرهم سهله و متوفره بعكس اللي مرا متعمقين فالموضوع غالبا مقاديرهم تكون من برا

اتمنى من قلبي انكم استفدتوا
 اتمنى لكم عام دراسي ممتع و موفق يا رب
شدوا حيلكم ي جميلات ترا الشهاده سند و سلاح
استودعتكم الله الى تدوينه اخرى