عنايتي ايام الاختبارات و شوية نصايح ♥

صباح الخير ♥

كيفكم وحشني جدا هالمكان لي حول الشهرين عنه 

بس كنت الفتره اللي راحت مشغوله كثير و حتى للانستا ما كنت متفرغه 

لكن ان شاء الله احاول اقسم وقتي اكثر بعد الاختبارات 

طبعا التدوينه اللي كانت بتنزل قبل فتره و تأجلت جاهزه 100% بس ماتنفع تنزل بالشتا 

فانتظروها بالصيف ان شاء الله و اللي متابعيني انستا و سناب متأكده انهم عرفوها

تدوينة اليوم موجهه لكل طالبه الاغلب الحين يججهز لاختبارات الفاينل و الله يوفقكم و يبارك لكم بوقتكم و بجهدكم 

و كمان انا زيكم غير انه عندي مناسبه مهمه جدا فالاجازه فلو سحبت على العنايه بشرتي بتتعب لانها مدلعه 

غير مع الضغوط و التوتر و السهر فتزيد الاحتفالات ببشرتي هههههه فتجنبا لذا كله حطيت لي نظام اسهل من السهل 

و ان شاء الله استمر عليه انتو ادعو بس ههههه 

انا اختباراتي مقسمه على شهر كامل و تقريبا كل اسبوع ماده او اثنين فرتبت عنايتي على هذا الاساس 

اعرف ناس مدلعين جدولهم موزع على اسبوع فعشان كذا شوفو اش يناسبكم و حطوه 

يلا نبدأ 

اول شي بكون منقصه لو ما اتكلمت عنه 

هو العنايه الداخليه , و هو تقريبا اكثر شي يتعب البشره و الجسم كله  بعد السهر 

فعشان كذا لازم تشربين مويا بكثره في دي الفتره لان دماغك مكون من مويا كثير و اذا نقصتي بشربها 

راح يتعب راح تضيع المعلومات منه , كثير بنات يشتكون من موضوع انو ذاكرت و تعبت بس اول ما ادخل الاختبار 

انسى او اول ما ارجع اراجع انسى ! هذا سببه قل المويا كيف تبين دماغك يسترجع المعلومه و هو مافيه موصل و موقد لهالشي !

كمان الاكل انتي صح يمكن طول فتره الاختبارات ما تبذلي مجهود جسدي لكن تبذلي مجهود عقلي 

فعشان كذا بتحتاجي لفيتامينات و طاقه اكثر و بليز بليز لا تاكلون شوكليت كثير 

الا بحالة اذا كنتو من الناس اللي يجرون و هم يذاكرون 

ههههههه شخصيا اعرف وحده كذا , حالتها صعبه ! 

يعني كل يوم سوي لك كاسة سموذي اوعصير تحبينه , انا ماما تهلكني بالبرتقال فذيك الفتره
و اذا عجزت مرا تسوي كيكة برتقال 

الله يحفظها مدري ليه برتقال بالذات بس من جد في فترة الاختبارات احس ان فيني شي صحي من كثرة البرتقال 

اشربو كمان مشروبات تهدي الاعصاب نعناع , بابونج , شاي اخضر 

و عادي كولو شوكليت بس خليها مكافأه لك ممكن بعد ما تخلصي كل شابتر تاخذي قطعه عشان تتحمسي انتي بطله 

نروح لخارجيا 

بالنسبه لي اكثر شي احسه يفيد بشرتي الماسكات 

بس من جد مالي خلق كل يوم اخلط رغم انه اغلب الماسكات جمعي المكونات و اخلطيهم و بس ! 

لكن برضه نستثقلها فعشان كذا اخترت ماسك مدة صلاحيته اسبوع و يعتبر بيرفكت بالنسبه للثانين اللي ما يتحملون اليوم

مكوناته :

نص بطاطسه صغيرره مسلوقه - 3 ملاعق حليب سايل - تقريبا ثلاث ملاعق حليب بودره - عسل - ثلاث ملاعق قشطه 

نخلط كل المكونات بخلاط الكاس الين يصير قوامه كريمي تقريبا زي الماش بوتيتو 

ممكن لو خلاطك كبير تهرسي البطاطس بالشوكه و تضيفي المكونات الباقيه و تخلطيها

*ان شاء الله حنزله بالانستقرام مره ثانيه لانه موجود اوردي بالهاشتاق من قبل 

نحطه بعلبه و ينحفظ بالثلاجه لمدة اسبوع ممكن يخرب قبل و ممكن بعد حسب الجو عندكم
اهم شي خذو منه بملقعه نظيفه 

و نحط منه مرتين ل ثلاث بالاسبوع , اي شي فيه بطاطس اعرفو انه يفتح و يصفي و يعطي نظاره 

طبعا في ناس بيقولو ليه ما تشتري جاهز و تريحي نفسك بقول اولا انا احب الطبيعي و ثانيا الجاهز مهما وصل 

مو زي الطبيعي اللي انتي عارفه اش فيه و عارفه انه خالي 100% من الكيماويات 

الشي الثاني هو التونر انا عني بحط موية ورد ببخاخ بالثلاجه و كل صباح احط منها "الوقت اللي اضمن افتح الثلاجه فيه"

عندكم خيار ثاني و هو تقريبا مدة صلاحيته لاسبوع و للناس اللي مالها خلق ماسكات 

هو تونر الشوفان : شوفان , موية ورد , نقطةة زيت لوز لو عندكم فيتامين اي افضل حطو كبسوله او ثلاث نقاط منه 

اتركوه يوم كامل تقريبا و بعدها صفوه و حطوه ببخاخ و بالثلاجه كل يوم مرتين بخو منه صبح و ليل 

بطل يفتح و يصفي و يزهي البشره بشكل ملحوظ 

طبعا هذا كله مع كامل روتينك المعتاد غسول و مرطب و سنفره مره او مرتين بالاسبوع 

نروح للجسم 

ما يحتاج حوسه بس انا سويت هالصابونيه و حبيت نتايجها للان ممكن تسوونها 

و استخدمها يوميا بدل الشاور جل , بطله الاغلب يمدحونها جدا 

مكوناتها صابونة بابايا 4 في 1 و اسكينول بالبابايا و قارورة موية ورد 

تقطع الصابونه لقطع و نحطها ب برطمان و نحط عليها كامل الاسكينول و المويا و نتركها لمن تذووب الصابونه 

عني سويتها لتجربه نص الصابونه و نص الاسكينول و نص موية الورد و اخذت تقريبا ثلاث او اربع ايام لين ذابت 

بس اتوقع لان انا حطيتها بغرفتي يمكن لو بالمطبخ ذابت اسرع 

طبعا بعدها لازم نرطب 

و لازم سنفره مرتين او ثلاث اسبوعيا 

شعري بايام الاختبارات يجف جدا جدا فاحاول بس اني ادهنه بزيت لو قبل الشاور بنص ساعه 

و ابعد عن الاستشوار نهائيا لانه بينشفه بزياده , ممكن بالايام اللي ما يكون عندنا فيها اختبارات 

احط زيت من الليل و انام فيه صح ما احب بس مضطره غير كذا ما اكثر حيل احط بالاطراف بس

 و الروتين العادي شامبو و بلسم و ماسك كالمعتاد ما اغيره

 

رموشي , حواجبي , هالاتي , اظافري احط عليهم فازلين قبل انام زي دايم 

و جد جد ماشاء الله فرق معي لان حواجبي ارسمها يوميا فلازم اعوضها 

مهما كان المنتج غالي او ما يضر بالنهايه هو منتج كيميائي فلازم نهتم بهالنقطه

بالنسبه للمذاكره ما احس اني لو قلت طريقتي بتفيدكم لان كل انسان و له طريقته .

بس اهم شي حطي نوت عند كل صفحه بورقه و لمن تجي تراجعي طلعيها كلها و راجعي منها
 بتصير اسهل و مرتبه اكثر

و نصيحه لو كنتي بالجامعه و تذاكرين من سلايد اطبعيها لانو اشعة الشاشه تضعف التركيز و بالتالي 

ما تساعد انها تثبت المعلومه براسك غير انه بتتكاسلين انك تراجعين منها كلها .

كمان فكرة الربط جميله جدا و تثبت المعلومه براسك بقوه 

انك تربطي المعلومه بشخص او موقف او مكان بحياتك 

زي مثلا افتكر ايام الابتدائي ماشاء الله شايفين كيف ! انو كان عندنا نحفظ رواة الاحاديث 

فكان في راوي اسمه ابو ذر و كان هو من اول من حيو الرسول عليه الصلاة و السلام بتحية الاسلام

فصديقتي البطله ربطت انو "الضر " اللي هم النمل يتكلمون و يسلمون على بعض زينا فعشان كذا للان ما نسيت هذه المعلومه

ممكن لو عندك خطوات تاخذي اول حرف من كل خطوه و تعطيه اسم شخص بحياتك 

مثلا حرف الميم تعطينه اسم محمد و هكذا , و لو كان عندك مميزات و عيوب تعطين اول حرف من كل ميزه لشخص تحبينه 

و اول حرف من كل عيب لشخص تكرهينه ههههههه 

كمان تسوين كلمه بأول حرف منهم برضو بطله خصوصا لو كانت الكلمه تضحك هنا اضمني انها ثبتت خلاص

و الاحلى بالنسبه لي انك تلحنين الكلام و تغنيها هنا صح تضحك تصير لكن صدقيني محا تنسينها هههههههه 

بس تقريبا هذا كل شي ببالي , اهم شي بنات تريحون نفسكم و تعطون نفسكم فرصه انكم تعيشون حياتكم 

اقصد انه مو 24 ساعه تروح بين نوم و اكل و مذاكره كذا انتي تظلمي نفسك 

لازم تعطين نفسك ساعه صفا لك باليوم تسوين فيها شي تحبينه و احلى شي لو كانت هالساعه مكافأه 

في نفس الوقت لا تتهاونين مع نفسك فالوقت 

اعرفي ان هالوقت محا يرجع مره تانيه بمجرد ما يروح اليوم ما عندك مجال تعوضينه 

و كمان لا تراكمين و لا تشوفين انه اوه اختباري بعد اسبوع بعطي نفسي اجازه الين قبل الاختبار بيوم 

حتى لو كان سهل ما تضمنين نفسك ابد 

ممكن تتعبين تمرضين لا قدر الله ممكن يصير شي بالبيت لا قدر الله 

فحطي كل الاحتمالات الممكنه و انجزي بدري بدري و لا تراكمي ارجوك ! لمصلحتك ♥
و كمان اذا صار لك مشكله لا تضغطين على نفسك روقي و اهدي و خذي كفايتك بالنوم
و ابدأي ذاكري و يإذن الله ربنا محا يضيع لك تعب 

و تذكروا " اذا كنت مجبرا فاستمتع , و قوله تعالى " و قل اعملوا فسيرى الله عملكم و رسوله و المؤمنين "

سوو اللي عليكم و الباقي على رب العالمين ♥

اتمنى من قلبي اني قاعده افيدكم و اقدم لكم شي 

بس لا تنسوني من دعوه بظهر الغيب

ربنا يوفقنا و يبارك لنا بجهدنا و وقتنا و يعطينا على قد تعبنا و اكثر 

استودعتكم الله و اشوفكم بتدوينه جديده ان شاء الله ♥♥♥