صباح الخير ، صباح البدايات النقيه
اليوم اول يوم في سنه جديده صفحه جديده تستنى بصمتنا عليها
كل سنه كل يوم و كل دقيقه هي فرصه لنا نكون احسن من اللي قبله
حبيت ابدأ معكم بروتين تنظيف و كأني انوي ننظف مع بعض صفحاتنا و نخليها انقى و اطهر ، يا رب ❤️
موضوعي لليوم انطلب مني كثير و كثير
و هو تنظيف البشره العميق ، طبعا فالبيت
لازم نحط ببالنا انو هالشي يبيله ممارسه عشان نوصل لنتيجه احترافيه
لانو هي مو طريقه وحده مافي غيرها لا هي تكنيكات مختلفه و كل وحده و يدها تعطيك نتيجه
فعشان كذا كل مره تكتشفي طريقه افضل من اللي قبلها ، و مع الوقت تزيد خبرتك و تعرفي اش الافضل لبشرتك
طبعا هالتنظيف يكون كل شهر مو كل اسبوع
يلا نبدأ ؟اول خطوه هي نجهز لنا مكان مناسب نحط فيه اغراضنا
عني افضل المطبخ عن الحمام اكرمكم الله لان فيه كل شي ممكن فجأه احتاجه
و ممكن بغرفتك عادي " محا احط لسته بالادوات بتركها لكم انتو تحددوا من الخطوات اش تحتاجون"
ثاني خطوه جهزي بشرتك نظفيها كالمعتاد بغسول و جففيها
يفضل انك تختاري وقت تكون بشرتك فيها هاديه مافيها حبوب و لا التهابات عشان تشتغلي على راحتك
ثالث خطوه و هي فتح المسام
هالخطوه مهمه جدا لو ضبطت كل اللي بعدها بيضبط ان شاء الله
لانها تخلي البشره تمتص كل المكونات اللي تنحط عليها بشكل افضل
في عدة طرق و اجهزه مختلفه كلها بالنهايه تعطينا نتيجه وحده
اول طريقه و هي الطريقه التقليديه : منشفه كبيره و مصدر بخار
اغلي مويه و حطيها بزبديه زجاج كبيره لا تخلينها بقدر لانه المويا تتفاعل مع المعدن
ممكن تضيفي للمويا زيت لافندر او نعناع لمزيد من الاسترخاء
اجلسي عندها تقريبا 5-8 دقايق و بعدها قومي
بس اهم شي لا يكون المكان اللي انتي فيه بارد لانو المسام بتتسكر و كأنك ي بو زيد ما غزيت هههههه
زي كذا تمام بس لمو شعركم لا تخلونه مفتوح
الطرق الاخرى تكون بالاجهزه
فيه اشكال كثيره زي هذا مثلا و هو تقريبا افضل الاشكال و أأمنها للاستخدام
عندكم هذا اللي تقريبا نفس حق الصوالين
هذا يفضل استخدامه للاحترافيين لانه انتي تتحكمي بمدة توجيه البخار يعني لاي منطقه تعطيها وقت اكثر من غيرها
و هذا شي صعب تحددينه من البدايه
رابع خطوه هي تنظيف المسام
هالخطوه هي الهدف الاساسي من عملنا عندنا هنا كم كذا طريقه
اولها و الشائعه جدا هي باستخدام العود دا "يس نسيت اسمو ههههه "
لكن صعب استخدامها لانو لو استخدمتيها بطريقه خطأ ممكن تجرحي نفسك او توسعي مسامك بطريقه غير ملحوظه
اهم شي قبل تستخدمينها عقميها ابسط شي جيبي مسحه طبيه و امسحي راسها
"عشان التدوينه فيها صور كثير بحط روابط بتويتر لطريقه الاستخدام و بحاول ادور انظف مقطع لووول"
طريقه ثانيه هي بأستخدام اللصقات الجاهزه
هالطريقه كثير كثير اشتكو انها توسع المسام بدل ما تصغرها
بس حل سريع و مستعجل و للناس المبتدئه
كمثال بيوريه و في من نيفيا و كثير شركات
طرق اخرى ماسك الجيلاتين
اتوقع تعرفو قد ايه احب دا الماسك و هي طريقتي فأزالة الرؤوس السوداء
لانه اوقات اقول وجهي نظيف ما يحتاج اروح اسويه تتطلع بلاوي تحسي طلع لك جلد جديد نظيف ههههه
فانصحكم فيه اكثر من اللصقات لانه يشد البشره بسبب وجود الكولاجين
هالصوره من انستقرامي مع طريقته :
- حليب او شاهي اخضر "مو مهم يكون حار".
- منشفه دافيه . - مويا دافيه في زبديه عميقه او مايكرويف .
الطريقه :. نحط فزبديه ملعقه و نص جيلاتين و ملعقه حليب او شاهي اخضر ، نقلبهم مع بعض شوي و نحطهم فوق الزبديه اللي فيها مويا حاره "حمام مائي" ، و نقلب اليين يصيرو سايل ناعم مافيه كتل و كلاكيع .
نجيب المنشفه الدافيه و نحطها ع الوجه عشان تفتح المسام ، و نحط بعدها الماسك بس ابعدوا عن اماكن الشعر ، اتركوه تقريبا نص ساعه و بعدها شيلوه و شوفو البلاوي اللي تتطلع طبعا هو ماسك مطاطي يعني يتقشر ما يتغسل . .
.
.
طبعا هو فايدته نفس فايدة لصقات الرؤوس السوداء ينظف تنظيف عممميق للبشره ، و يطلع الاوساخ من جذورها ، يعني حطو ببالكم هو ما يعالج يعني ما يصغر المسام او يقلل من الرؤوس السودا ابدا 👌😌❤️❤️❤️
""
اخر حل هو ماسك بياض البيض نتيجته قريبه من ماسك الجيلاتين فاللي ما تلقى الجيلاتين بالسوق تسوي هذا
كمان نزل بانستقرامي كذا مره
مكوناته : عباره عن بياض بيضه + دقيق رز
نخفق البيضه الى ما تكون رغوه و بعد كذا نضيف ملعقه من دقيق الرز عليها
طريقة الاستخدام : نجيب مناديل و نقطعها على شكل الوجه و بعد كذا نفرد الماسك على كل الوجه و نجيب المناديل
و نحطها عليه مباشرة قبل يجف و نتركه تقريبا نص ساعه لين تحسي وجهك صار يابس هههه
تبدأي تنزعي الماسك بشويش " لا تقربونه من شعركم و حواجبكم لانه بشيلهم بطريقه هههههه"
"اللي ما فهمت شرحي غردت بفيديو بتويتر يشرحه " يسير شكل وجهك كذا بس هي حاطه طبقات كثيره مناديل
خامس خطوه بعد ما نظفنا الرؤوس السوداء نحتاج نقشرها و نزيل الجلد الميت
نحتاج سنفره جاهزه مثل سانت ايفز او لوريال او اي سنفره انتم مرتاحين عليها
نفرد السنفره ع الوجه و نعرض الوجه على البخار لمده خمس دقايق تقريبا " لحد ما تبدأ تنشف السنفره "
نرفع الوجه عن البخار و نبدأ بحركات دائريه مع ضغط خفيف نسنفر الوجه
بعد كذا ننظف الوجه بأستخدام هالاسفنجه و بعدها نشطفه بمويا
الخطوه السادسه و هي ترطيب البشره بماسك مناسب
هالخطوه فيها خيارات كثيره جدا جدا اي ماسك تحبيها اختاريه سواء جاهز او طبيعي
فانستقرامي في مجموعه كبيره ماشاء الله اختارو منها اللي يناسبكم فهالهاشتاق #daloola_c_h
انا ممكن اختار ماسك بالخيار او البطاطس لان فيهم نسبة مويا كبيره و البشره تكون عطشانه هالوقت
ماننسى العيون نحط عليها شرايح خيار او بطاطس و نسترخي
نتركه عالوجه المده المحدده و بعدها نغسله و ننتقل للي بعديه
الخطوه السابعه
نقفل المسام ممكن بثلجه نحطها بقطعه شاش و نمررها ببطء على كل الوجه
ممكن نرش موية ورد بارده على كل الوجه و ممكن تونرك المعتاد يقوم بالمهمه
الخطوه الاخيره هي الحفله و خليتها اخر شي لعدة اسباب
لان البشره بتكون نظيفه و لانو بعد هالخطوه البشره يبغالها عنايه خاصه و ما تكون قابله للشد و السحب هههههه
هالخطوه هي ازالة شعر الوجه عرفتو ليه اخر شي ؟
طبعا هالخطوه فيه عدة طرق مختلفه لانجازها
بقول هنا و دايم اقول انه اتبعي الطريقه الشايعه في عيلتك يعني امك و اخواتك يستخدمونها
عشان يكونو عارفين اش افضل طريقه لعملها و اش يتصرفوا لو طلع حبوب او اي شي ثاني
لانو دايم تجيني اسئله اش افضل طريقه لازالة شعر الوجه هو مافي افضل لانه كل طريقه و لها عيوبها
لكن زي ما قلت الافضل تستخدمي اللي كل اللي حولك يستخدموها بدل ما تستخدمي طريقه غير
و يصير معاكي شي لا قدر الله و تقولي لهم ساعدوني يقول ماا نعرف !
احنا ببيتنا يستخدمو الفتله بهالجهاز فأنا استخدمها معهم و مرتاحه عليها
لكن فالاوقات اللي مافي احد يسوي لي استخدم شرايح فيت
ما تفرق الطريقه قد ما تفرق العنايه بعدها
لازم تكون بشرتك نظيفه و بعد ما تشيلي لو كنتي تشيلي بشمع فلازم تستخدمي زيت اطفال مثلا عشان تشيلي البقايا
و بعدها بكل الطرق لازم تمرري ثلجه ع المكان عشان تهدى و تتقفل مسامك
و بعدين تحطي طبقه من مرهم فيسودين عشان لو طلعت حبوب تختفي
و ممكن تكرري هالعمليه مرتين باليوم اللي شلتي فيه .
**على فكره الوان الخطوط تفرق هو لاي نوع من البشرات "اسألو الصيدلي عنها "
الخطوه الاخيره ترطيب البشره ما عدا الاماكن اللي حطينا عليها المرهم بمرطبك كالمعتاد
و نشرب مويا بعدها لانو البخار يفقدنا مويا مره كثير من جسمنا و نعيما ي جميلاتي ❤️
و الحمدلله اوه و اخيرا خلصت حبيت اختصر لكم كثيرر و ذكرت اهم الخطوات اللي تفرق نتايجها معنا
اتمنى اني اكون افدتكم بهالبوست و ان شاء الله اشوفكم ببوست اخر❤️
سبحانك اللهم و بحمدك اشهد ان لا اله الا انت استغفرك و اتوب اليك ..
1-1-1436 > سنه سعيده بإذن الله❤️❤️
