افكار سهله لفطور لذيذ + وصفات فطوري الانستقراميه ♥♥

صباح الخير

كيف حالكم ؟؟ كيف حال النفسيه مستعدين لبعد بكرا ..
 اش اكثر وجبه تفضلونها ؟؟
عني بقولكم الفططور و خصوصا بالاجازات
لانو ابدع فيه غير كذا انا انسانه صباحيه , عادي جدا اصير طول اليوم نفسيه لاني صحيت العصر
احس خلاص اليوم ضاع , زمان كنت اعتبر وجبة الفطور سناك
اما الحين مع ثورة الصحه اللي بنعيشها بدأت تكبر و تصير وجبه متكامله
طبعا صرت احرص انو ع الاقل تكون صحيه بنسبة 80% لانو بوجهة نظري هي اكثر وجبه سهل نخليها صحيه
و كلنا عارفين قد ايش هالوجبه مهمه ، بس كثير ناس يقولو مافي وقت بقولكم الحريص ع الشي بيلقاله وقت و بنفس الوقت
بساعدكم بأفكار بسيطه و يمديكم تسوونها بسرعه
و احرص كمان اني اول ما اصصحى اشرب كاس مويه بارده ع الريق ينقي الجسم من السموم و يهيئ المعده للاكل
و غالبا ما افطر الا بعد ساعتينن او اكثر من اول ما اصحى


فاليوم بأذن الله حنتكلم عن وجبة الفطور ايام الدراسه بشكل موجز
حنقسم الفطور لقسمين
 فطور عادي : هو اللي يكون سريع و سهل و تاكلينه بالبيت
 فطور الشنطه : هو اللي تاخذيه معك للدوام


قبل ما ابدا في اشياء لازم تكون فدولابك للفطور و غالبا تكون متوفره فأغلب البيوت بس بصوره غير صحيه
اول شي الكورن فليكس 
لو ترجمنا المسمى بيكون رقائق الذره يعني المكون الاساسي فيه الذره
لكن لو شفنا شي اسمه بران فليكس اللي هو رقائق النخاله بيكون بديل صحي
زي هذا

بكون صريحه معكم فالبدايه راح تستثقلو الطعم لكن انا كنت اخلط معه كمشه من سبيشال كي
و حتى سبيشال كي و فيتنس صحي الى حد ما
و الاهم من هذا انه هالانواع تشبع اكثر من الكورن فليكس

الشي الثاني الشوفان ي الله ويني عنه من زمان له وصفات كثيره و لذيذه
كنت اكره جدا حتى بالشوربه و الحين لا خلص اسوي مناحه هههههه

الشي الثلاث ما عرفت اش اسميها اللي هي الحشوات اللي ندهن بها الساندوتشات
زي زبدة الفول السوداني بس ما نكثر منها لانها مليانه سعرات مقارنه بغيرها
انواع اخرى من الزبد كاجو لوز بندق < طبعا مو نوتيلا 
مربيات انواع كثيره صحيه ، لبنه و ابعدوا عن الجبنه اللي كلها زيوت و بلاوي

الشي الاخير الفواكه
حلو كل اسبوع تسوو زياره لسوبرماركت و تنوعوا من الفواكه 
احس الحين سار سهل نشتري فواكه و ما تخرب لان نظام السوبرماركتس زي بنده و الدانوب 
حتى لو حطيتي حبه وحده تتوزن و تتحاسب فشي كويس 

في اشياء فكل تقضيه تكون بالعربيه زي التوست البر و البيض و الخضار 
فمالو داعي نفصل فيها ..





نجي لفطور البيت :

اول شي حنبدأ بالاشياء اللي ممكن تجهزيها من الليل و تتركيها بالثلاجه

زي كذا اش تحتاجي ؟ زبادي او روب - عسل - فواكه على ذوقك " موز - توت - تفاح - الخ " - مكسرات " هالوصفه مستخدمين جارنولا"
بعد كذا في زبديه او كاسه يفضل تتغطى تحطي طبقه روب و بعدها الفواكه و العسل و نكرر
فالنهاية نغطيه و نتركه بالثلاجه و الصباح نرش عليه المكسرات و نتلذذ بالطعم
فعلا لذيذه و خصوصا الحين بالصيف تنعش امم اشتهيت ههه ...

فكره اخرى : نحتاج شوفان - زبادي - فواكه - حليب -
ف الوصفه استخدموا حبوب الشيا تلاقوها متوفره بالدانوب بس اذا ما اتوفرت مو مشكله
نحط كل المكونات مع بعض و نخلي شوي من الفاكهه و نخلطهم مع بعض و فالثلاجه الصباح نضيف عليهم الفواكه
هذه يسمونه اوتميل مو الكل يحبه فجربوه قبل
"اللي بالموز ضايفين له بودرة كاكاو"

ممكن اجهز هالصحن من الليل ؟؟ اكيد
اسلقي البيض من الليل و حطيه بالثلاجه كامل لا تقشريه ,
 لا تستغربوا من يوم اعرف نفسي و ماما تسلق البيض الليل و ناكله الصباح و ماشاء الله ما فينا الا العافيه
الفواكه قطعيها من الليل اكيد و يبقى التوست
الصباح اول ما تقومي قطعي البيض و طلعي الفاكه و حطي التوست بالحماصه تجهزي
بتلاقين كل شي جهز و احلى فطور بثواني

اكيد محا انسى اشهر و اسرع وجبة فطور بالعالم
و هو الكورن فليكس  او البران فليكس اكثر نوع اشتريه هو سبيشل كي
احبه مع اللبن الزبادي و التمر و احليه بالعسل وجبه متكامله لحد كبير و لا الذ
فيكم تسوونه بالحليب او بالعصير زي ما تحبو و تضيفو لها فاكهه زي موز فراوله توت ترفعو من قيمتها الغذائيه

السندويتشات افكار كثيره منها

اللي تحت البيض افوكادو مهروس


ناخذ جوله ع الصور اللي قد نزلتها بالانستقرام من فطوري في الويكند ماشاء الله

 هنا نرفع لافتة الحاجه ام الاختراع
لحظه اختبركم اش تتوقعون فالصوره ؟؟

خلاص حقولكم هذا عيش برجر دخلت المطبخ مافي شي يحمس تاكليه
لقيت عيش برجر قديم يمكن له يومين , خفقت بيضه مع حليب و فانيلا و غطستهم فيه
و ع الشوايه و طلع لذيييذ مع التوت و العسل , فلا تقيدوا نفسكم فكروا خارج الصندوق

 هنا قمت تعبانه و مالي خلق شي جهزت لي ربع قرص صامولي مدهون بزبده فول سوداني و عليه موز
و عسل و كوب قهوه تركيه عشان اصحصح , اصلا لو تشوفو شكلي وقتها كيف الحمدلله ع الصحه

 قلوب قلوب قلوب هذا بان كيك بتعرفون وصفته تحت بس لذيذ لذه , اقدر اقول انه هو اللي حببني فالشوفان
و غير كذا لمن اعرف اني طالعه مشوار طويل اكله لانه يمسك البطن ما يجوع بسرعه

 اومليت مافيه شي زايد بس الحلو فيه انه يحتوي على نسبة خضار و تنوع يشهي العين تاكل
فإذا كان عندك مريض او طفل حطي له الخضار اللي يحبها و زينه له و ان شاء الله حياكله

 فطوري بأيام الكسل كورن فليكس سبيشل كي و تمر و زبادي عشان ارفع قيمته الغذائيه
اتوقع هنا حليته بمربى يس يس عليا طلعات غريبه

 وجبتي المفضله اللذيذه بس الغريب ما احب اكلها لحالي هههه نفسيه
اسويها لمن نكون مجتمعين ع الفطور و يكونو جايبين فول و تميس و كذا
انا ما اكل الفول و لا خواتي فنسوي بالتميس هذه عباره عن تميسه " بسكوت" و فوقها جبن كيري و زيت زيتون و زعتر ناشف
و ندهن التميسه و فوقها الخضار اللي تحبيها , تقرمش و لذيذه جدا خصوصا لو كان الزيت طاززه و اصلي
"شميت ريحته و انا اوصف " يبووي

بيتنا نحب الصامولي اكثر من التوست فهذا فرنش صامولي هههه مافيه جديد
مجرد سكر و حليب و بيضه و فانيلا و عليه عسل  ,,



نروح لفطور الشنطه :
كثير بنات ما يمديهم يفطوروا بالبيت و ما ودهم يفطوروا من الجامعه اللي اغلب اكلهم غير صحي بتاتا
فياخذوا معاهم فطور , ع الاغلب انا اخذ معي سناك و اكله بالبريك
طيب اش ممكن اخذ معي

ابسط شي و اسرع شي السموذي و خصوصا للبنات اللي يستحو عادي حطيه بمق و اشربيه كانه كوفي
و كمان منعش للصيف ..
ماله مقادير محدده او وصفات محدده , الافضل و المشبع اكثر مجموعة فواكه معاهم لبن زبادي
ممكن ثلاث انواع او اربع مع لبن زبادي و مويه للخلط , حلو لو تقطعي الفواكه و تثلجيها من الليل


كمان سلطة الفواكه مع قطعة توست و شريحة جبنه مثلا

كمان ممكن تاخذوا سناك زي مكسرات و فواكه

كثير بنات وقت البريك يفتحو شنطهم و يطلعو علبهم
و هذا شي جيد جدا

حدلكم على كم حساب فالانستقرام هم لهم الفضل بعد الله في حبي للفطور
**اضغطوا على اسم الحساب تنفتح في الانستقرام **


bayan2sj بيان ملكة السموذي و الاكل الصحي و عندها مدونه مفيده جدا
softmud90 هي اللي عندها وصفة البان كيك اللذيذ و غيرو كثيررر وصفات شهيه
miss_elegantsweet عندها وصفات كثيره ماشاء الله مو بس فطور
videomeals هذا نفس وجبات 15 ثانيه بس النسخه الاجنبيه الصحيه , كانو عاقلين بس الحين صار شغلهم اغلبه دعايات
فأرجعو للوصفات القديمه
nnuerblog هذه ماشاء الله مبدعه فالاكلات ككل اتوقع عندها حساب خاص بالوصفات
mmkuwari هذا ولد قطري و انا اكتب عن فطور الشنطه طرا على بالي دايما يسوي فطوره و يورينا الشنطه اللي ياخذه معاه للدوام
في حسابات كثيره جميله و مفيده جدا بس هذه التوب عندي و كل مابغى شي جديد اروح لهم
و مقاديرهم سهله و متوفره بعكس اللي مرا متعمقين فالموضوع غالبا مقاديرهم تكون من برا

اتمنى من قلبي انكم استفدتوا
 اتمنى لكم عام دراسي ممتع و موفق يا رب
شدوا حيلكم ي جميلات ترا الشهاده سند و سلاح
استودعتكم الله الى تدوينه اخرى 

كيف اختار الواقي المناسب + مراجعه للواقي المفضل عندي ♥♥

السلام عليكم
كيفكم مع التجهيز للدوامات ؟؟ < الفيس معبر جدا ههه
طيب شي اساسي يكون عندك واقي شمس سواء كنتي طالبه او موظفه
او حتى ربة منزل تطلع تفطر بحوش بيتهم ههههههه
شمسنا الله يجيرنا من حر جنهم يا رب
فحتكلم عن واقيات الشمس و كيف تعرفي الافضل لك من موضوعي فالانستقرام
و كمان عن واقي الشمس المفضل عندي

**

بقولكم معلومات بسيطه جدا عن كيفية الاختيار و الاساسيات اول شي ليه نحط واقي ؟؟
فيه نوعين من الاشعه المتسلطه هه تخترق طبقات الجلد اللي هي :
Uvb يخترق طبقات الجلد السطحيه
Uva يخترق طبقات الجلد الداخليه
و الاثنين يخترقوا الغيوم و السحب و الاسطح الزجاجيه يعني حتى و انتي فالبيت يفضل تحطي واقي شمس !!
و بالتالي تأثر على البشره من تصبغات و نمش و حبوب و تجاعيد و ما الى ذلك
و يرفعوا نسبة الاصابه بالسكن كانسر حفظنا الله و اياكم من كل مكروه على المدى البعيد

**

طيب فيه انواع للواقيات : نوع فيزيائي يعكس اشعة uvb , uva او يثبت الاشعه الفوق بنفسجيه .
نوع كيميائي يمتص الاشعات uvb , uva . و غالبا يستخدم للتسمير اذا كان مفيد .
طيب اش افضل نوع الفيزيائي اللي يحتوي على titanium dioxide ، zinc oxide
او الكيميائي اللي يحتوي على Benzophenone
الافضل يكون فيه الاثنين عشان نوازن و نستفيد و لو شوي بأشعة الشمس
طبعا الفيزيائي لوحده يعطينا لون ابيض لمن يمتد على البشره اما الكيميائي فيكون طبيعي لحد ما
أغلب الواقيات تحتوي على حمايه من uvb لأنها اقوى .

السؤال الاهم كم اختار درجة الحمايه ؟؟
فالبدايه spf هي اللي تحدد ، طيب اش يعني ؟؟
sun protection factor = عامل الحمايه من الشمس / بطريقه مبسطه كم تستمر حمايته ؟؟
لو اخترتي 5 spf يحمي بشرتك لمدة 50 دقيقه
لو اخترتيspf 15 يحمي بشرتك لمدة 2:30 .
لو اخترتي spf 30 يحمي بشرتك لمدة 5 ساعات .
لو اخترتي spf 90 يحمي بشرتك لمدة 15 ساعه .

هذا يعني انو على حسب الوقت لازم تغيريه يعني لو اخترتي spf 5 يعني كل 50 دقيقه تغيريه و هكذا .
يفضل للبشره الدهنيه انه قوامه يكون جل ، اما البشره الجافه كريمي قوامه ..
فالنهايه بقولكم شي طبيعي يعطينا تأثير اللون الابيض
لانه يحتاج وقت عشان تمتصه البشره 30 - 50 دقيقه
عشان كذا حطيه قبل بفتره طويله ليبدأ حمايته
حاولت اعطيكم الزبده ههه لانو الموضوع يطول شرحه
اختاروا من الماركات الطبيه المعروفه نيتروجينا - بايوديرما - بيزلين - فيتشي - لويس يدمر - ايفين و الكثير
و في منه اشكال على بخاخ و على كريم و على زيت و على ستيك


نجي للمفضل عندي




اول شي مرا لا تعلقوا على شكله لان مادة التعليب غبيه تمسك فيها االاشياء 
هذا الواقي لاحظت البنات اما يحبوه مراااا او يكرهوه جددددا
انا و لله الحمد كنت من الفئه الأولى
طبعا اش مكتوب عليه dry-touch = ملمس جاف ، ليه ؟ لأنه للبشره الدهنيه يعني يقصدوا ما يدبق او يزيت البشره
فأبد ما ينفع لا للبشره العاديه و لا الجافه
حبيته جدا لعدة اسباب : ما يعطينيي المنظر المبيض كأني حاطه قناع
يترك بشرتي نظيفه ما يدبق او يزيت بعد فتره
اوقات كثيره اسحب ع المرطب و احطه و احسه يرطب لي كويس
ما احس ان في شي على وجهي عادي بشرتي تتنفس مو مكتومه
لانه يعطي المظهر النظيف فيعطيني مساحه للبيبي كريم او الاساس يتوزع بدون ما يتكتل
حقي هذا للترم اللي فات كان دوامي اربع ساعات ماشاء الله ههه فعشان كذا اخذته 30


عيبه ما يتوفر فالنهدي ، بس موجود ف بنده و الدانوب
و سعره كل مازادت درجة الحمايه زاد السعر




اتمنى استفدتو من هالتدوينه و كانت خفيفه عليكم
و اتمنى لكم يوم سعيده دائما و ابدا

ارجعي للدراسه بكل ثقه ، نصايح ع السريع ♡

السلام عليكم و رحمة الله 

وصلنا للجزء الثاني من التجهيز و خليته للاستعداد النفسي 

لأني لمن كنت توني بدايه جامعه كنت احتاج هالنوع من البوستات يطمني شوي 

ف البدايه كلنا نتحمس لدوام و خصوصا لو كنا رايحين لمرحله جديده 

قبل ادخل الجامعه  اكذب عليكم لو قلت احد طمني , صديقاتي اللي مرا معي محد دخل الا وحده و بفرع ثاني 

هذا غير كلام البنات اللي ما قد دخلوا الجامعه اصلا ! بنت عمي تقول و صديقتي تعيد و كلام مررعب الصراحه 

خفت , فخذيها مني لا تسمعي الا من احد خايف عليك و يبي مصلحتك زي اختك .. 

نصيحتي لك لازم تفهمي ان الجامعه مجتمع كبير جدا 

تشوفي فيه كل الاشكال و كل المستويات سواء الاخلاقيه او الماديه ..

فلا تسخري من اللي اقل منك و لا تتطالعي للي اعلى منك خليك قنوعه و راضيه ..

و فيها الخير و فيها الشر و فيها الصالح و الطالح يعني عادي جدا تلقي بنات عسل عسل و فالمقابل تلقي بنات الله يهديهم 

لكذا لا توثقي بأحد من البدايه , و لا تشكي بالناس خليكي طبيعيه بالبدايه و اذا شوفتيهم كويسات 

ابدأي تقربي منهم اكثر , لازم تفرقي بين صديقتي اللي اشكيلها و تشكيلي 

و بين زميلتي اللي جمعتنا الدراسه و لازم ما اخليها تعرف ككل شي عني و عن عايلتي 

لا تصيري منطويه و تجلسي لوحدك بالجامعه بالذات لازم تكون لك علاقات كثيره 

سواء بنات زيك او استاذات , عشان تاخذي اكبر قدر من الخبره فالتعامل

هذا غير انك راح تكوني اول من يعرف بالدورات و النشاطات 

غير انو تعرفي مين الاستاذات الاحسن و مين اللي تشرح اي كلام و ممكن تعرفي اش تحب هالاستاذه فتكاليفها

دا كلو من العلاقات اللي تكونيها فأبدي من الحين حتى لو كنتي ثلاث سنه ..

فالجامعه للاسف تنتشر المصلحه كثير يعني مو الكل بيصادقك عشانك

لا في بنات يتقربوا منك عشان تحضريها او تسوي لها تكاليفها 

فخلي شخصيتك قويه من البدايه و ارفضي بهدوء و لباقه 

مصلحتك مصلحتك ثم مصلحتك 

اوكي صديقاتك من ايام الثانوي على عيني و راسي لكن تخرب عليك دراستك هنا استوب 

يعني تجي تقلك هذه الاستاذه مفهيه ما تحضر خلينا نسحب , او انتي غيابتك قليل خلينا نريح اليوم 

قولي لها انا تهمني مصلحتك قبل مصلحتي فتعالي نحضر و لاحقين ع السوالف 

ما تدري في اليوم اللي تغيبي فيه ممكن الاستاذه تعطي بونس او شي 

لانها قد سارت معايا مره شفت درجاتي ع الورقه و رحت الاودس اشوفها غير !! 

لمن رحت تاني يوم الاستاذه قالت انا اعطيت البنات اللي ما عندهم غيبات بونس يسعدها يا رب ..

كمان المذاكره الجامعه حتراكمي كثير فالبدايه ليه ؟ لانو محد يدور وراكي 

و الاستاذات يعطو وقت طويل نوعا ما فلا تقولي اوه سهل حخليه قبلها بيوم ابدا غلط خذيها مني 

لاني انقرصت قبل كذا ، نظمي وقتك بالبدايه و ابدأي بالتكليف من بداية المده يسير عندك مجال تبدعي و تاخذي درجات اعلى

بالنسبه للمذاكره و الاختبارات فالتحضيري كانو يعطونا اجازه وقت الاختبارات 

يعني وقت الميد ترم ما نداوم الا وقت الاختبار فعشان كذا كان في شوية وقت نذاكر 

لكن لمن اتخصصنا طار هالدلع و صرنا عاااادي في نفس اليوم ميد و كويز و برزنتيشن 

فعشان كذا لااازم تبدأي تعودي نفسك تذاكري أول بأول عشان تكوني جاهزه لهالمفاجأت 

افتكرت ايام الثانوي كنا نأجل الواجبات و التسميع لمن يكون عندنا اختبار ابو 10 دلع دلع ههههه

لا تنسي هدفك الاساسي اللي داخله عشان و هو الشهاده , 

اوكي اهتمي و تمكيجي لكن لا تخليهم ينسوك الهدف الاهم ,

خليك واثقه بنفسك , قصيره ؟ بتلقين اقصر منك كثير و يتمنو طولك ..

سمره؟ لولا جمال السمر ما انصنع التان ..

طويله بزياده ؟؟ مانتي شايفه الناس منهبله ع الكعوب !! ..

شعرك مو ناعم ؟؟ مييين مايخق ع الشعر الكيرلي الحين سويه كيرلي و عيشي حياتك ..

فيك اثار حبوب ؟؟ ي شيخه عندنا و عندك خير هههههه

التخصص محا اقول شي غير اقرأي عن التخصص اللي تبيه و ممكن لو حيرانه تسوي اختبارات تفيدك 

و حاليا بالجامعات يعملو هالاختبارات فشوفيه و شوفي قدرات و حطي ببالك طبيعة عملك بعد التخرج 

و اسئلي بنات يكونو شطار بتخصصهم و حابين باقي التخصصات لاني اول مادخلت الجامعه سألت بنت 

عن تقنية المعلومات و قالت هذا التخصص بينقرض بعد خمس سنين ههههه فجعتني و طبعا معروف اش هو ابد كلامها

كان من غيره او حقد ما اعرف !! 

و توكلي على الله و استخيري و ربنا يكتب لي و لكم مافيه الخير بس اهم شي لا تخلي احد يتحكم بميولك 

مهما كان له سلطه عليك حاولي بكل الطرق 

لا تخلي شي يعيقك عن حلمك و هدفك مهما كان 

فهذا الوقت لبدأ الدوام اشغلي وقتك بقراءة السير الذاتيه لناس ناجحه بمجالها و شوفي كيف كانو و كيف ساروا 

بس اكيد انو ماجا و هم مسدوحين ههههه لا اكيد انهم كافحوا و تعبوا و يمكن شافوا الموت عشان يوصلوا لهالمرحله 

و لا تقولي انا مجبوره او كرهوني دراستي

 حبيبي لا تضيعي وقتك فالحسره ع الماضي دامك وقعتي استمتعي لانو وقتك و صحتك و شبابك محا يرجع 

اخر بارت حتكلم فيه عشان تزيدي ثقتك بنفسك اهتمي بنظافتك 

انا عارفه انو ماشاء الله اغلبكم مهتمين بهالجزء بس اوقات اشياء صغيره تفرق 

اول شي لازم شاورك يكون يومي و استخدمي فيه ليفه تنظف جسمك زين

 لان هالترسبات تسبب اشياء كثير منها الرايحه و السواد 

افضل شاور جل اليومي يكون ديتول او لايف بوي ليه ؟؟ لانه ينظف و يقتل البكتريا اللي فالجسم 

و على فكره الشاور جل الثانيه مافيها خاصية التعقيم ..

مهم جدا تهتمي بالديودرنت و كذا 

ششوفي النوع اللي يناسبك انا عني افضل ليدي ستيك و فيتشي 

مهم كمان تشوفي موضوعي بالانستقرام هنا عن العنايه بهالمنطقه 

ملابسك الداخليه لازم اول ما تررجعي تغيريها , ليه ؟ لانها تشربت موية جسمك كثير فلازم تتبدل 

ابعدي عن الساتان و غيرها و خذي قطنيات مريحه اكثر  و الالوان الغامقه بعد لانو جسمك فالحر تتفتح مساماته فتمتص الالوان

و البسي شورتات لو كنتي تلبسي تنوره لانو الاحتكاك يسمر المنطقه بعد 

الافضل تلبسي الفوط اليوميه عشان في ناس مع الحر تزيد افرازات هالمنطقه و هي مكتومه فممكن تسبب رايحه 

بشررتك سواء كنتي تحطي ميك اب او لا اول ما ترجعي من الجامعه 

اغسليها بغسول مناسب و رطبيها ..

ملخص كلامنا : ثقي بنفسك و قدراتك , خلي هدفك من دخولك واضح قدام عينك دايم , نظمي وقتك و اهتمي بدراستك , استمتعي بأيامك لانها محا ترجع مهما كانت صعبه 

اختاري صديقاتك بعنايه لانهم ع الاغلب بيكملوا معاكي , ابتسمي دايم , خلي ضميرك و خوفك من الله هو جهاز تحكمك الخاص . 

و بس خلصنا في اشياء كنسلتها لانو كثير تكلموا عنها حبيت اتكلم عن الاشياء اللي كنت ادور عنها اول سنه 

اتمنى تكونو استفدتو و الى اللقاء في تدوينه اخرى 

سبحانك اللهم و بحمدك اشهد ان لا اله الا انت استغفرك و اتوب اليك 

♡♡♡

ارجعي للدراسه بكل اناقه ♡♡ -1-

السلام عليكم .. 

حنبدأ مع بعض التجهيز للجامعه و المدرسه ان شاء الله 

 هذا البوست موجه اكثر للجامعيات بس ما يمنع بنات المدارس يستفيدوا 

هنا حهتم بس بالشكل بشكل عام , يعني الاهتمام بالنفس حيكون بالاستعداد النفسي .. 

طبعا حبدأ من فوق من الشعر .. 

حاولي يكون على طبيعته قدر الامكان يعني لو شعرك كيرلي خليه كيرلي
 بشوية خطوات و بيسير جميل و مرتب 

 بدأت سلسله بالانستقرام للشعر الكيرلي خليكم متابعينها ..

 لو كنتي مهتمه بشعرك مهما كان نوعه بيسهل عليك 

لا تتعبي شعرك بالاستشوار القوي و الليس دايم

 مايمنع مره فالاسبوع تستشوري 

بس مو كل يوم اصلا شكلك حيسير مزيف 

الا اذا مرا تحتاجي

 لا تقولي مافي تساريح لنوعية شعري لا في بس انتي دوري , اقرب مثال الظفاير بأشكالها و انواعها 

اشوفها تناسب كل الانواع , حاولي تبدأي تتدربي من دحين عشان تتقنيها .. 

و كمان في خدع زي لمن تتروشي من الليل 

و تلفي شعرك كعكات "بُن" 

و تنامي يطلع شعرك ويفي طبيعي 

او تنظفريه يطلع مكسر

شوية تساريح بسيطه و سهله

 لا تقولو كلها مفتوحه و كذا يميدكي تسويها كعكه من تحت 

بعد كذا نجي للميك اب .. 

اكثر موضوع كنت متعقده منه و متحمسه له بنفس الوقت قبل ادخل الجامعه هههه 

تذكري لكل مقام مقال , حلو فالصباح يكون شي ناعم و خفيف و بالليل زي ما بدك ,
 لا تقارني نفسك باليتويوبرز اللي تحط شدو و تدمج و اضاءه و حوسه لا !
 هم ملامحهم باهته تحتاج زهاوه لكن احنا معروفه ملامحنا كخلجيات بالذات 

و ما امانع انك بيوم تحطي شدو ممكن يكون لحمي على وردي او ما شابه و لون واحد مدموج بأتقان
خصوصا لو كنتي تحطي اساس لان البشره تبهت ..

الاساسيات : كريم مرطب + واقي شمس + بيبي كريم + بودره خفيفه للتثبيت + بلشر خفيف + ماسكارا + ايلانير او كحل ملون + روج ناعم 

طبعا شوفي اش تحتاجي و ضيفي او شيلي ممكن انا عندي هالات فلازم كونسيلر ممكن انتي بشرتك نضره و  صحيه ماشاء الله فما تحتاجي بيبي كريم ..

 عني مو كل يوم احط هالرصه لا ! 

 مره كحل ملون بدون ماسكارا مره ما احط بلشر و كذا .. و المسكارا اذا حطيت احط من فوق بس عشان ما تسيح
و ممكن اوقات احط اضاءات كريميه زي حقت ريفلون و بينفت تعطي توهج طبيعي بس طبعا فالسنه حسنه 

فمهم يكون عندك اكحال تناسب لون عيونك و ارواج بألوان ناعمه و هاديه و مسكارا لطيفه و بلشر بلون هادي يدووب يبان بس يعطيك تورد طبيعي و ممكن يكون تنت  

الميك اب اكثر شي افضله فيديو فحيكون على تويتر ان شاء الله 

نروح ع الملابس ..

هنا نجي لنظام جامعتك , يعني مثلا وحده نظامهم عادي بنطلونات , الثانيه ممنوع حتى التنانير الميدي ..

فعشان كذا اسألي قبل تشتري و تتورطي في موضوع بالاقلاع تقريبا في انظمة كل الجامعات باللبس .

اهم شي يكون عندك الاساسيات , و هذا يرجع لستايلاك باللبس مثلا انتي تحبي القمصان اكثر وحده غيرك تحب تلبس تيشرت خفيف و عليه جاكيات قطن خفيف 

فأنتي حتكثري من القمصان و هي تكثر من التيشرتات , بس طبعا انا افضل تكوني منوعه و ما تجلسي على استايل واحد تملي !

الاساسيات : 

تيشرتات ملونه و هذه اكيد موجوده بدولابك , قميص ابيض , قميص جينز , جاكيتات قطنيه خفيفه 

بديهات بيضا و سودا , قمصان مثلا كروهات و كذا , ممكن تاخذي سكارف او اثنين , كم تنوره سوداء و ممكن رمادي للتغيير بقصه تناسب جسمك

طبعا احس هذه بدولاب الاغلبيه بس انا احب تكون ملابس خاصه للجامعه ..

الاشياء الزايده : ممكن بلوزه او اثنين شيفون , تنوره ملونه و مشجره للتغير لو كانت جامعتك تسمح 

بلايز قليل ع الموضه , بنطلونات ملونه او مشجره و ممكن تلبسي من دولابك اكيد ..

عموما الملابس مرا مفتوح المجال و يعتمد على استايلك العام و انظمة جامعتك .. 

و من جد لا تتحمسوا انتي مو عروسه و بتدبش هههه

ما يمنع تشتري جديد لكن بعقل 

عااادي جدا تلبسي من ملابسك لانو مافي دولاب بنت 

خالي من تيشرتات و قمصان و هي تقريبا اللبس السايد بالجامعات 

في بنات تقول اروح اشوف اش الدارج بجامعتي و اشتري بعد 

انا اقولها اوكي مافي مشاكل بس 

خلي لك ستايلك الخاص 

كم لوك بسيط 

و هذا اخذته من الانستا الصراحه ما عرفت احدد الحقوق لمين !!!!

 البلوفر حلو بأيام الشتويه و طبعا الكعب حيسير فلات و الشنطه حتكبر  ..

الجزم الله يكرمكم .. 

كل بنات الجامعات بالعالم اجمعوا ان الكعب غير مرغوب فيه .. 

في وحده معانا بالجامعه تخيلو يوميا ماشاء الله لا قوة الا بالله بالكعب , بعيدا عن طولها في بنات بطولها و يمشون بكل ثقه بفلات 

بس هذه انا افكر كيف عروقها تخيلو من 8-4 و لفلفات بين المباني و المسافه طويله ما تلعب يعني هلاااك لها قبل اي احد ثاني 

فنصيحه لسلامتك و صحتك اولا و مظهرك العام اخيرا لا تلبسي كعب اصلا نااااااااااادر تلاقين وحده بكعب

فعشان كذا خذي جزمة سبورت ناعمه "سنيكرز" 

بس حطي ببالك انك حتلبسيها على تنوره  فخذي اشكال تناسب 

ممكن تاخذي جزمه عاديه"فلات" اهدأ و ارتب و الاهم تكون مرررريحه , بحط لكم اسماء ماركات مريحه جزمهم و مرتبه 

 اختار الجزم المقفله عشان ما تسمر رجلي من الشمس و ابعد عن اللون الاسود حتى بالشراريب عشان ما تمتص الحراره
 حلويكون عندك فلاتات ملونه و ممكن 

مفتوحه تلبسيها بالايام الخفيفه و ايام الاختبارات ك تغيير

و هذه اكيد موجوده بدولابك 

 .. 

الماركات : اديداس , نايك , هش بابيز , تومس , لاكوست , بوما , سيكتشرز , نيولوك , سبلاش , الدو , زارا , اتش اند ام , اف اند اف و كثير محلات عاديه ..

هنا كم شوز عجبني من ماركات مختلفه ..

من اليمين فوق اديداس , زارا , كروكس , لاكوست 

و صلنا لاكثر شي احتار فيه للحين و هو الشنط 

بقولكم وش صار معي اول ما دخلت الجامعه كنت متحمسه حيل و اشتريت شنطه كتف واحد و لونها بيج فاااتح كانت حلوه الصراحه 

و كاشخه محد قدي ههههههه طبعا اول اسبوع ما شريت الكتب و بس الدفتر و بقية الاشياء اكيد خفيفه ..

ثاني اسبوع شفت الكتب انصدممت اش بيشيلهم !

طبعا بتقولو ليه تاخذي الكتب لانو احتاجها فيها تمارين و نحلها بالكلاس و كذا ..

قعدت اسبوع كمان و جري ع السوق ادور باك باق و تخليو الشنطه لان لونها فاتح صارت سوداء من العبايه مرا زعلت عليها 

تاني سمستر رحت اول اسبوع بشنطه عاديه تكفي الدفتر بس و لمن عرفت انو مو لازم كتب معي و يكفيني احمل السلايدات ع الايباد و اخذه 

رحت اشتريت شنطه كتف و صرنا جامعيات بحق و حقيق هههههههه , و كمان ثقل الشنط و هي فاضيه مهم خذي الخفيفه مو اللي تكون و هي فاضيه ثقيله فكيف لو اتملت 
و كمان اللون لانو لو كانت فاتحه حيقلب لونها مع العبايه و التنوره و افضلها تكون جلد اسهل فالتنظيف

فعشان كذا شوفي الوضع اول ثم روحي اشتري , و اذا كنتي عارفه ان في مبنى تترددي عليه كثير استأجريلك لوكر افضل

هذه شوية شنط عجبتني من ماركات متنوعه فالاسعار .. 

من اليمين فوق قس , زارا , مايكل كورس , اتش اند ام 

في بنات اشوفهم يسألوا اش احتاج يكون بشنطتي ؟

فالبدايه في اساسيات و زيدي عليها الاشياء اللي تحتاجيها 

مناديل - مناديل معطره او معقم - كريم يفضل غير معطر 

واقي لو كان واقيك حمايته ضعيفه - مزيل مناكير لو تحطي كثير و افضل النوع اللي يجي قطن 

مشط صغير - ربطة شعر و بنس - مرطب شفايف - لصقات جروح - مرايه - عطر خفيف - محفظه عشان بطاقتك حتسير صديقتك الدايمه ههه 

كوتكس لأي طارئ - ورق المرحاض اعزكم الله - صابون ورقي - و اكيد عدتك الدراسيه 

الباقي انتي وش تحتاجي ؟ ..

و اكيد لو شوفتي اشياء ما تحتاجيها فحتثقل عليكي الشنطه شيليها 

اسعار عاليه : قوتشي , دكني , لويس فينتون , رالف لورين 

اسعار متوسطه عاليه : تيدبيكر , مايكل كورس , لاكوست , جوسي كوتور , تشارلز اند كيت 

اسعار متوسطه الى رخيصه : الدو , زارا , بيرشكا , اديداس , نايك , بوما , كل محلات المولات تقريبا تلاقي فيها 

حتى شو اكسبرس يجيبو شنط كويسه بس جودتها اقل تناسب سعرها 

و لا تنسي النظاره الشمسيه  مهممممه 

بالنسبه للاكسسوارات , خليك ناعمه يعني سلاسل و اساور و حلقان و خواتمم ناعمه
انا عني ما احب الخواتم البسها فالكلاسات اللي اكون مستعمه بس هههه 



المهم جدا هي الساعه الصراحه لمن انسى ساعتي اضيييع خصوصا لو كان عندي بريك اكره ساعة الجوال
فخذي ساعه لو تحبي جلد اسود او بني تناسب مع كل الملابس اما لو حديد حلو تكون ذهبي و فضي مع بعض عشان ما تحدك بالاكسسوار
و الساعات ماركاتهم معروفه 

من اليمين فوق جوسي كوتور , كالفين كلاين , قس , اتش اند ام 

فالنهايه اللي بقوله ترا مو لازم تشتري غالي و ترهقي ميزانيه اهلك

مدي رجلك على قد لحافك 

يعني خذي الفكره الاساسيه و شوفي منها في المحلات العاديه

زي هذه الشنط و الجزم اكرمكم الله 

متوفره بكل مكان " كشكل يسمون الشنط الشوبنق باق " 

بكذا خلصنا الجزء الأول حاولت اعطيكم المفيد 

و خصوصا البنات اللي لسى تحضيري

استنى رايكم هنا و بالانستا و اتمنى اكون وفقت و افدت 

و اشوفكم على خير بالجزء الثاني